[๑๐๐] "สมฺมปฺปธานสมฺปนฺโน สติปฏฺฐานโคจโร

วิมุตฺติกุสุมสญฺฉนฺโน ปรินิพฺพิสฺสตฺยนาสโว"ติ ๑- คาถํ อภาสิ.

ตตฺถ สมฺมปฺปธานสมฺปนฺโนติ สมฺปนฺนจตุพฺพิธสมฺมปฺปธาโน, เตหิ กตฺตพฺพ- กิจฺจํ สมฺปาเทตฺวา ฐิโตติ อตฺโถ. สติปฏฺฐานโคจโรติ กายานุปสฺสนาทโย สติปฏฺฐานา โคจโร ปวตฺติฏฺฐานํ เอตสฺสาติ สติปฏฺฐานโคจโร, จตูสุ สติปฏฺฐาเนสุ ปติฏฺฐิตจิตฺโตติ อตฺโถ. คุณโสเภน ปรมสุคนฺธา วิมุตฺติเยว กุสุมานิ, เตหิ สพฺพโส สมฺมเทว สญฺฉนฺโน วิภูสิโต อลงฺกโตติ วิมุตฺติกุสุมสญฺฉนฺโน. ปรินิพฺพิสฺสตฺยนาสโวติ เอวํ สมฺมา ปฏิปชฺชนฺโต ภิกฺขุ น จิรสฺเสว อนาสโว หุตฺวา ปรินิพฺพิสฺสติ สอุปาทิเสสาย อนุปาทิเสสาย จ นิพฺพานธาตุยาติ อตฺโถ. อิทเมว จ เถรสฺส อญฺญาพฺยากรณํ อโหสิ.