อปิจ "สทฺธา"ติ อิมินา สทฺธาธนํ, "สํวิภาครตา, อจฺฉาทนญฺจ ภตฺตญฺจ, เสนาสนํ ปทีปิยํ. อทาสึ อุชุภูเตสุ, วิปฺปสนฺเนน เจตสา"ติ อิมินา จาคธนํ, "สีเลน สมฺปนฺนา, จาตุทฺทสึ ปญฺจทสึ ฯเปฯ ปญฺจสิกฺขาปเท รตา"ติ อิมินา สีลธนํ หิริธนํ โอตฺตปฺปธนญฺจ, "อริยสจฺจาน โกวิทา"ติ อิมินา สุตธนํ ปญฺญาธนญฺจ ทสฺสิตนฺติ สา อตฺตโน สตฺตวิธอริยธนปฏิลาภํ. "อุปาสิกา จกฺขุมโต ฯเปฯ อนุวิจรามิ นนฺทนนฺ"ติ อิมินา ตสฺส ทิฏฺฐธมฺมิกํ สมฺปรายิกญฺจ อานิสํสํ วิภาเวติ. ตตฺถ กตาวาสา นิปฺผาทิตสุจริตาวาสา. สุจริตกมฺมํ หิ ตทตฺเต อายตึ จ สุขาวาสเหตุตาย "สุขวิหารสฺส อาวาโส"ติ วุจฺจติ. เตนาห "กตกุสลา"ติ.