ฉฬภิญฺโญ ปน หุตฺวา "ภควโต สมฺมุขา ยํ สาวเกหิ ปตฺตพฺพํ, ตํ มยา ปตฺตนฺ"ติ, ภิกฺขุสํเฆ จ "ยสฺส มคฺเค วา ผเล วา กงฺขา อตฺถิ, โส มํ ปุจฺฉตู"ติ สีหนาทํ นทิ. เตน ตํ ภควา "เอตทคฺคํ ภิกฺขเว มม สาวกานํ ภิกฺขูนํ สีหนาทิกานํ ยทิทํ ปิณฺโฑลภารทฺวาโช"ติ ๓- เอตทคฺเค ฐเปสิ. โส เอกทิวสํ อตฺตโน สนฺติกํ อุปคตํ คิหิกาเล สหายภูตํ มจฺฉรึ มิจฺฉาทิฏฺฐิพฺราหฺมณํ อนุกมฺปมาโน ตสฺส ทานกถํ กเถตฺวา เตน จ "อยํ มม ธนํ วินาเสตุกาโม"ติ ภกุฏึ กตฺวาปิ "ตุยฺหํ เอกภตฺตํ เทมี"ติ วุตฺเต "ตํ สํฆสฺส เทหิ มา มยฺหนฺ"ติ สํฆสฺส ปริณาเมสิ. ปุน พฺราหฺมเณน "อยํ มํ พหูนํ ทาเปตุกาโม"ติ อปฺปจฺจเย ปกาสิเต ทุติยทิวสํ ธมฺมเสนาปตินา สํฆคตาย ทกฺขิณาย มหปฺผลภาวปฺปกาสเนน ตํ ปสาเทตฺวา "อยํ พฺราหฺมโณ `อาหารเคเธน มํ ทาเน นิโยเชสี'ติ มญฺญติ, อาหารสฺส มยา สพฺพโส ปริญฺญาตภาวํ น ชานาติ, หนฺท นํ ชานาเปมี"ติ

[๑๒๓] "นยิทํ อนเยน ชีวิตํ นาหาโร หทยสฺส สนฺติโก

อาหารฏฺฐิติโก สมุสฺสโย อิติ ทิสฺวาน จรามิ เอสนํ.