ตตฺถ ชาติมเทน มตฺโตหนฺติ อหํ อุทิจฺเจ ๒- พฺราหฺมณกุเล นิพฺพตฺโต, "น มาทิโส อุภโต สุชาโต อญฺโญ อตฺถี"ติ กุลมาเนน มตฺโต มานถทฺโธ อจารินฺติ ๓- โยชนา. โภคอิสฺสริเยน จาติ วิภเวน อาธิปจฺเจน จ เหตุภูเตน โภคสมฺปทญฺจ อิสฺสริยสมฺปทญฺจ ปฏิจฺจ อุปฺปนฺนมเทน มตฺโต อหํ อจารินฺติ โยชนา. สณฺฐาน- วณฺณรูเปนาติ สณฺฐานํ อาโรหปริณาหสมฺปตฺติ, วณฺโณ โอทาตสามตาทิฉวิสมฺปตฺติ, รูปํ องฺคปจฺจงฺคโสภา. อิธาปิ วุตฺตนเยน โยชนา เวทิตพฺพา. มทมตฺโตติ วุตฺตปฺปการโต อญฺเญนปิ มเทน มตฺโต.

นาตฺตโน สมกํ กญฺจีติ อตฺตโน สมกํ สทิสํ ชาติอาทีหิ สมานํ อติเรกํ วา กญฺจิ น มญฺญิสํ น มญฺญึ, มยา สมานมฺปิ น มญฺญึ, กุโต ตโต อธิกตรนฺติ ๔- อธิปฺปาโย. อติมานหโต พาโลติ พาโล อหํ ตโต ๕- พาลภาวโต อติมาเนน ขตูปหตกุสลาจาโร, ตโตเอว ปตฺถทฺโธ อุสฺสิตทฺธโช ถมฺภวเสน ครูนมฺปิ นิปจฺจการสฺส อกรณโต ภุสํ ถทฺโธ อโนนมนถทฺธชาโต อุสฺสิตมานทฺธโช.

@๕ สี. อติมานหโต พาโลติ ตโต, อิ. อติมานหโต พาโลติ หตํ ตโต