อุภินฺนํ ติกิจฺฉนฺตํ ตนฺติ ตํ อตฺตโน จ ปรสฺส จาติ อุภินฺนํ ทฺวินฺนํ โกธพฺยาธิติกิจฺฉาย ติกิจฺฉนฺตํ ขมนฺตํ ปุคฺคลํ เย ชนา ธมฺมสฺส อริยาจารธมฺเม อกุสลา, เต พาลา "อยํ อวิทฺทสุ โย อตฺตานํ อกฺโกสนฺตสฺส ปหรนฺตสฺส กิญฺจิ น กโรตี"ติ มญฺญนฺติ, ตํ เตสํ อโยนิโส มญฺญนนฺติ อธิปฺปาโย. "ติกิจฺฉนนฺ"ติปิ ๒- ปฐนฺติ, ติกิจฺฉนสภาวนฺติ อตฺโถ.

เอวํ เถเรน วุจฺจมานํ ธมฺมํ สุตฺวา อกฺโกสกพฺราหฺมโณ สํวิคฺโค ปสนฺนจิตฺโต จ หุตฺวา เถรํ ขมาเปตฺวา ตสฺเสว สนฺติเก ปพฺพชิ. เถโร ตสฺส กมฺมฏฺฐานํ เทนฺโต "อิมสฺส เมตฺตาภาวนา ยุตฺตา"ติ เมตฺตากมฺมฏฺฐานํ ทตฺวา โกธปริยุฏฺฐานาทีสุ ปจฺจเวกฺขณาทิวิธึ ๓- ทสฺเสนฺโต "อุปฺปชฺเช เต"ติอาทิมาห. ตตฺถ อุปฺปชฺเช เต สเจติ สเจ เต กมฺมฏฺฐานํ อนุยุญฺชนฺตสฺส กญฺจิ ปุคฺคลํ นิสฺสาย จิรปริจโย ๔- โกโธ อุปฺปชฺเชยฺย, ตสฺส วูปสมาย:-

"อุภโตทณฺฑเกน เจปิ ๕- ภิกฺขเว กกเจน โจรา โอจรกา องฺคมงฺคานิ โอกนฺเตยฺยุํ, ตตฺราปิ โย มโน ปทูเสยฺย, น เม โส เตน สาสนกโร"ติ ๖-