โสยํ โรโค ทิฏฺโฐ วจนกเรนาติเทวสฺสา"ติ อิมํ คาถมาห.

ตตฺถ สกลนฺติ สพฺพํ. สมตฺตนฺติ สมฺปุณฺณํ, สพฺพภาคโต ๑- อนวเสสนฺติ อตฺโถ. โรคนฺติ ทุกฺขทุกฺขตาทิวเสน รุชนฏฺเฐน โรคภูตํ อุปาทานกฺขนฺธปญฺจกํ สนฺธาย วทติ. นาทฺทสํ ปุพฺเพติ สตฺถุ โอวาทปฏิลาภโต ปุพฺเพ น อทฺทกฺขึ. โสยํ โรโค ทิฏฺโฐ, วจนกเรนาติ เทวสฺสาติ สมฺมุติเทวา อุปปตฺติเทวา วิสุทฺธิเทวาติ สพฺเพปิ เทเว อตฺตโน สีลาทิคุเณหิ อติกฺกมิตฺวา ฐิตตฺตา อติเทวสฺส สมฺมาสมฺพุทฺธสฺส โอวาทปฏิกเรน สรภงฺเคน โส อยํ ขนฺธปญฺจกสงฺขาโต โรโค วิปสฺสนาปญฺญา- สหิตาย มคฺคปญฺญาย ปญฺจกฺขนฺธโต ๒- ทิฏฺโฐ, ปริญฺญาโตติ อตฺโถ. เอเตน เอวํ อตฺตภาวกุฏิกายมฺปิ อนเปกฺโข พาหิรํ ติณกุฏิกํ กถํ ๓- ปฏิสงฺขริสฺสตีติ ทสฺเสติ.

อิทานิ ยํ มคฺคํ ปฏิปชฺชนฺเตน มยา อยํ อตฺตภาวโรโค ยาถาวโต ทิฏฺโฐ, สฺวายํ มคฺโค สพฺพพุทฺธสาธารโณ. เยน ๔- เนสํ โอวาทธมฺโมปิ มชฺเฌ ภินฺนสุวณฺณ- สทิโส ยตฺถาหํ ปติฏฺฐาย ทุกฺขกฺขยํ ปตฺโตติ เอวํ อตฺตโน อรหตฺตปฏิปตฺตึ พฺยากโรนฺโต:-