ปุญฺญกฺเขตฺตํ มนุสฺสานํ ปฏิคฺคณฺหิตฺถ ทกฺขิณนฺ"ติ อิมา คาถา อภาสิ.

ตตฺถ ทนฺธาติ มนฺทา, จตุปฺปทิกํ คาถํ จตูหิ มาเสหิ คเหตุํ อสมตฺถภาเวน ทุพฺพลา. คตีติ ญาณคติ. อาสีติ อโหสิ. ปริภูโตติ ตโต เอว "มุฏฺฐสฺสติ อสมฺปชาโน"ติ หีฬิโต. ปุเรติ ปุพฺเพ ปุถุชฺชนกาเล. ภาตา จาติ สมุจฺจยตฺโถ จสทฺโท, น เกวลํ ปริภูโตว, อถโข ภาตาปิ มํ ปณาเมสิ "ปนฺถก ตฺวํ ทุปฺปญฺโญ อเหตุโก มญฺเญ, ตสฺมา ปพฺพชิตกิจฺจํ มตฺถกํ ปาเปตุํ อสมตฺโถ, น อิมสฺส สาสนสฺส อนุจฺฉวิโก, คจฺฉ ทานิ ตุยฺหํ อยฺยกฆรนฺ"ติ นิกฺกฑฺเฒสิ. ภาตาติ ภาตรา.

โกฏฺฐเกติ ทฺวารโกฏฺฐกสมีเป. ทุมฺมโนติ โทมนสฺสิโต. สาสนสฺมึ อเปกฺขวาติ สมฺมาสมฺพุทฺธสฺส สาสเน สาเปกฺโข อวิพฺภมิตุกาโม.