ตตฺถ วิวิตฺตนฺติ ชนวิวิตฺตํ สุญฺญํ อรญฺญาทึ. อปฺปนิคฺโฆสนฺติ นิสฺสทฺทํ สทฺทสงฺฆฏฺฏนรหิตํ. วาฬมิคนิเสวิตนฺติ สีหพฺยคฺฆทีปิวาฬมิเคหิ จริตํ. อิมินาปิ ชนวิเวกํเยว ทสฺเสติ ปนฺตเสนาสนภาวทีปนโต. เสนาสนนฺติ สยิตุํ อาสยิตุญฺจ ยุตฺตภาเวน วสนฏฺฐานํ อิธ เสนาสนนฺติ อธิปฺเปตํ. ปฏิสลฺลานการณาติ ปฏิสลฺลานนิมิตฺตํ,

เอวํ ภาวนานุรูปํ เสนาสนํ นิทฺทิสนฺโต เสนาสเน สนฺโตสํ ทสฺเสตฺวา อิทานิ จีวราทีสุปิ ตํ ทสฺเสตุํ "สงฺการปุญฺชา"ติอาทิ วุตฺตํ. ตตฺถ สงฺการปุญฺชาติ สงฺการานํ ปุญฺชํ สงฺการปุญฺชํ, ตโต กจวรฏฺฐานา. อาหตฺวาติ อาหริตฺวา. ตโตติ ตถา อาหฏโจฬกฺขณฺเฑหิ. กรเณ หิ อิทํ นิสฺสกฺกวจนํ. ลูขนฺติ สตฺถลูขรชนลูขาทินา ลูขํ อวณฺณามฏฺฐํ. ธาเรยฺยาติ นิวาสนาทิวเสน ปริหเรยฺย, เอเตน จีวรสนฺโตสํ วทติ.

นีจํ มนํ กริตฺวานาติ "อนฺตมิทํ ภิกฺขเว ชีวิกานนฺ"ติอาทิกํ ๒- สุคโตวาทํ อนุสฺสริตฺวา นิหตมานทปฺปํ จิตฺตํ กตฺวา. สปทานนฺติ ฆเรสุ อวขณฺฑรหิต, ๓- อนุฆรนฺติ อตฺโถ. เตนาห "กุลา กุลนฺ"ติ. กุลา กุลนฺติ กุลโต กุลํ, กุลานุปุพฺพิยา ฆรปฏิปาฏิยาติ อตฺโถ. ปิณฺฑิกายาติ มิสฺสกภิกฺขาย, อิมินา ปิณฺฑปาตสนฺโตสํ วทติ. คุตฺตทฺวาโรติ สุปิหิตจกฺขาทิทฺวาโร. สุสํวุโตติ หตฺถกุกฺกุจฺจาทีนํ อภาเวน สุฏฺฐุ สํวุโต.