ภาเวตฺว โพชฺฌงฺคพลานิ ปณฺฑิตา

อุทคฺคจิตฺตา สุมนา กตินฺทฺริยา

ผุสึสุ นิพฺพานปทํ อสงฺขตนฺ"ติ อิมาปิ สงฺคีติกาเรหิ วุตฺตคาถา.

ตตฺถ นตฺถิ เจตสิกํ ทุกฺขํ, อนเปกฺขสฺส คามณีติ คามณิ อเปกฺขาย ตณฺหาย อภาเวน อนเปกฺขสฺส มาทิสสฺส โลหิตสภาโว ปุพฺโพ วิย เจตสิกํ ทุกฺขํ โทมนสฺสํ นตฺถิ, โทมนสฺสาภาวาปเทเสน ภยาภาวํ วทติ. เตนาห "อติกฺกนฺตา ภยา สพฺเพ"ติ. อติกฺกนฺตา ภยา สพฺเพติ ขีณสํโยชนสฺส อรหโต ปญฺจวีสติ มหาภยา อญฺเญ จ สพฺเพปิ ภยา เอกํเสน อติกฺกนฺตา อตีตา, อปคตาติ อตฺโถ.