นิรสฺสาทา ภวา ทิฏฺฐาติ ตีหิ ทุกฺขตาหิ อภิภูตา เอกาทสหิ อคฺคีหิ อาทิตฺตา ตโย ภวา นิรสฺสาทา อสฺสาทรหิตา มยา ทิฏฺฐา. วิสํ ปิตฺวาว ฉฑฺฑิตนฺติ

มุตฺโต อาฆาตนา ยถาติ ยถา โจเรหิ มารณตฺถํ อาฆาตนํ นีโต เกนจิ อุปาเยน ตโต มุตฺโต หฏฺฐตุฏฺโฐ โหติ, เอวํ สํสารปารํ นิพฺพานํ คตตฺตา ปารคู จตูหิปิ อุปาทาเนหิ อนุปาทาโน ปริญฺญาทีนํ โสฬสนฺนํ กิจฺจานํ กตตฺตา กตกิจฺโจ กามาสวาทีหิ อนาสโว อายุกฺขยา อายุกฺขยเหตุ ตุฏฺโฐ โสมนสฺสิโก โหติ.

อุตฺตมนฺติ เสฏฺฐํ. ธมฺมตนฺติ ธมฺมสภาวํ, อรหตฺเต สิทฺเธ สิชฺฌนเหตุ อิฏฺฐาทีสุ ตาทิภาวํ. สพฺพโลเกติ สพฺพโลกสฺมิมฺปิ, ทีฆายุกสุขพหุลตาทิวเสน สํยุตฺเตปิ โลเก. อนตฺถิโกติ อนเปกฺโข. อาทิตฺตาว ฆรา มุตโตติ ยถา โกจิ ปุริโส สมนฺตโต อาทิตฺตโต ปชฺชลิตโต เคหโต นิสฺสโฏ, ตโต นิสฺสรณนิมิตฺตํ น โสจติ, เอวํ ขีณาสโว มรณนิมิตฺตํ น โสจติ.