ภิยฺโย กามปตฺถนาย อุทาหรณํ ทสฺเสนฺโต "ราชา"ติอาทิมาห. ตตฺถ ปสยฺหปฺปฐวึ วิเชตฺวาติ อตฺตโน วํสานุคตํ ปฐวึ พลกฺกาเรน อภิวิชิย. อาวสนฺโตติ ปสาเสนฺโต ๑-. โอรํ สมุทฺทสฺสาติ อนวเสสํ สมุทฺทสฺส โอรภาคํ ลภิตฺวาปิ เตน อติตฺตรูโป ปารํ สมุทฺทสฺส ทีปนฺตรมฺปิ ปตฺถเยยฺย.

อวีตตณฺหาติ อวิคตตณฺหา. อูนาวาติ อปริปุณฺณมโนรถาว. กาเมหิ โลกมฺหิ น หตฺถิ ติตฺตีติ ตณฺหาวิปนฺนานํ อิมสฺมึ โลเก วตฺถุกาเมหิ ติตฺติ นาม นตฺถิ.

กนฺทนฺติ นนฺติ มตปุริสํ อุทฺทิสฺส ตสฺส คุเณ กิตฺเตนฺตา กนฺทนํ กโรนฺติ. อโห วตา โน อมราติ จาหูติ อโห วต อมฺหากํ ญาตี อมรา สิยุนฺติ จ กเถนฺติ, คาถาสุขตฺถํ เหตฺถ วตาอิติ ทีฆํ กตฺวา วุตฺตํ.