นตฺถิ ทานิ ปุนาวาโส, เทวกายสฺมิ ชาลินีติ เอตฺถ ชาลินีติ เทวตํ อาลปติ, เทวเต เทวกายสฺมึ เทวสมูเห อุปปชฺชนวเสน ปุน อาวาโส อาวสนํ อิทานิ มยฺหํ นตฺถีติ อตฺโถ. ตตฺถ การณมาห "วิกฺขีโณ"ติอาทินา. สา กิร เทวตา ปุริมตฺตภาเว เถรสฺส ปาทปริจาริกา, ตสฺมา อิทานิ เถรํ ชิณฺณํ วุฑฺฒํ ทิสฺวา ปุริมสิเนเหน อาคนฺตฺวา "ตตฺถ จิตฺตํ ปณิเธหิ, ยตฺถ เต วุสิตํ ปุเร"ติ เทวูปปตฺตึ ยาจิ. อถ "ทานิ นตฺถี"ติอาทินา เถโร ตสฺสา ปฏิวจนํ อทาสิ. ตํ สุตฺวา เทวตา วิหตาสา ตตฺเถวนฺตรธายิ.

อถ เถโร เวหาสํ อพฺภุคฺคนฺตฺวา อตฺตโน อานุภาวํ สพฺรหฺมจารีนํ ปกาเสนฺโต "ยสฺส มุหุตฺเตนา"ติ คาถมาห. ตสฺสตฺโถ:- ยสฺส ขีณาสวภิกฺขุโน มุหุตฺตมตฺเตน เอว สหสฺสธา สหสฺสปฺปกาโร ติสหสฺสิมหาสหสฺสิปเภโท โลโก สพฺรหฺมกปฺโป สหพฺรหฺมโลโก สํวิทิโต สมฺมเทว วิทิโต ญาโต ปจฺจกฺขํ กโต, เอวํ อิทฺธิคุเณ อิทฺธิสมฺปทาย จุตูปปาเต จ วสีภาวปฺปตฺโต โส ภิกฺขุ อุปคตกาเล เทวตา ปสฺสติ, น ตสฺส เทวตานํ ทสฺสเน ปริหานีติ. เถเรน กิร ชาลินิยา เทวตาย ปฏิวจนทาน- วเสน "นตฺถิ ทานี"ติ คาถาย วุตฺตาย ภิกฺขู ชาลินึ อปสฺสนฺตา "กึ นุ โข เถโร ธมฺมาลปนวเสน กิญฺจิ อาลปตี"ติ จินฺเตสุํ. เตสํ จิตฺตาจารํ ญตฺวา เถโร "ยสฺส มุหุตฺเตนา"ติ อิมํ คาถมาห.

อนฺนภาโร ปุเรติ เอวนฺนาโม ปุริมตฺตภาเว. ฆาสหารโกติ ฆาสมตฺตสฺส อตฺถาย ภตึ กตฺวา ชีวนโก. สมณนฺติ สมิตปาปํ. ปฏิปาเทสินฺติ ปฏิมุโข หุตฺวา ปาทาสึ, ปสาเทน อภิมุโข หุตฺวา อาหารทานํ อทาสินฺติ อธิปฺปาโย. อุปริฏฺฐนฺติ เอวํนามกํ ปจฺเจกพุทฺธํ. ยสสฺสินนฺติ กิตฺติมนฺตํ ปตฺถฏยสํ. อิมาย คาถาย ยาว จริมตฺตภาวา อุฬารสมฺปตฺติเหตุภูตํ อตฺตโน ปุพฺพกมฺมํ ทสฺเสติ. เตนาห "โสมฺหิ สกฺยกุเล ชาโต"ติอาทิ.