"อฏฺฐิกงฺกลกุฏิเก"ติอาทิกา จตสฺโส คาถา อตฺตานํ ปโลเภตุํ อุปคตาย คณิกาย โอวาทวเสน อภาสิ. ตตฺถ อฏฺฐิกงฺกลกุฏิเกติ อฏฺฐิสงฺขลิกามยกุฏิเก. นฺหารุปสิพฺพิเตติ นวหิ นฺหารุสเตหิ สมนฺตโต สิพฺพิเต. อรญฺเญ กุฏิโย ทารุทณฺเฑ อุสฺสาเปตฺวา วลฺลิอาทีหิ พนฺธิตฺวา กริยนฺติ, ตฺวํ ปน ปรมเชคุจฺเฉน อฏฺฐิกงฺกเลน ปรมเชคุจฺเฉเหว นฺหารูหิ พนฺธิตฺวา กตา, อติวิย เชคุจฺฉา ปฏิกฺกูลา จาติ ทสฺเสติ. ธิรตฺถุ ปูเร ทุคฺคนฺเธติ เกสโลมาทิโน นานปฺปการสฺส อสุจิโน ปูเร ปริปุณฺเณ, ตโต เอว ทุคฺคนฺเธ ธิรตฺถุ ตว ธีกาโร ๒- โหตุ. ปรคตฺเต มมายเสติ อิทญฺจ เต ทุคฺคนฺธสฺส อุปริ โผฏสมุฏฺฐานํ ปริสฺสยํ เอวํ อสุจิทุคฺคนฺธํ เชคุจฺฉํ ปฏิกฺกูลสมาทานํ ตาทิเส เอว อญฺญสฺมึ ปเทเส โสณสิงฺคาลกิมิกุลาทีนํ คตฺตภูเต กเฬวเร มมตฺตํ กโรสิ.

คูถภเสฺตติ คูถภริตภสฺตสทิเส. ตโจนทฺเธติ ตเจน โอนทฺเธ ฉวิมตฺต- ปฏิจฺฉาทิตกิพฺพิเส. อุรคณฺฑิปิสาจินีติ อุเร ฐิตคณฺฑทฺวยวตี ๓- ภยานกภาวโต อนตฺถาวหโต ปิสาจสทิสี. ยานิ สนฺทนฺติ สพฺพทาติ ยานิ นว โสตานิ นว วณมุขานิ สพฺพทา รตฺตินฺทิวํ สนฺทนฺติ สวนฺติ อสุจึ ปคฺฆรนฺติ.

ปริพนฺธนฺติ สมฺมาปฏิปตฺติปริพนฺธภูตํ. ภิกฺขูติ สํสาเร ภยํ อิกฺขนฺโต ภินฺนกิเลโส วา ทูรโต ปริวชฺชยเตติ ๑- มมตฺตํ น กโรติ. มีฬฺหํ จ ยถา สุจิกาโมติ จอิติ นิปาตมตฺตํ, ยถา สุจิชาติโก สุจิเมว อิจฺฉนฺโต สสีสํ นฺหาโต มีฬฺหํ ทิสฺวา ทูรโตว ปริวชฺเชสิ, เอวเมวํ ๒- ภิกฺขูติ อตฺโถ.