อรหา ปน หุตฺวา เถโร สตฺถุ สนฺติกํ คจฺฉนฺโต จกฺขุปถโต ปฏฺฐาย จนฺเทน, สุริเยน, อากาเสน, มหาสมุทฺเทน, สิเนรุนา ปพฺพตราเชน, สีเหน มิครญฺญา, หตฺถินาเคนาติ เตน เตน สทฺธึ อุปเมนฺโต อเนเกหิ ปทสเตหิ สตฺถารํ วณฺเณนฺโตว อุปคจฺฉติ, เตน ตํ สตฺถา สํฆมชฺเฌ นิสินฺโน ปฏิภาณวนฺตานํ อคฺคฏฺฐาเน ฐเปสิ. อถ เถเรน อรหตฺตปฺปตฺติโต ปุพฺเพ จ ปจฺฉา จ ตํ ตํ จิตฺตํ อาคมฺม ภาสิตา, เถรํ อุทฺทิสฺส อานนฺทตฺเถราทีหิ ภาสิตา:-

[๑๒๑๘] "นิกฺขนฺตํ วต มํ สนฺตํ อคารสฺมา อนคาริยํ

วิตกฺกา อุปธาวนฺติ ปคพฺภา กณฺหโต อิเม.