๔๐๒. ๑. อญฺญตราเถรีคาถาวณฺณนา

เอกนิปาเต ๑- อิทานิ เถรีคาถานํ อตฺถสํวณฺณนาย โอกาโส อนุปฺปตฺโต, ตตฺถ ยสฺมา อิธ ๑- ภิกฺขุนีนํ อาทิโต ยถา ๒- ปพฺพชฺชา อุปสมฺปทา จ ปฏิลทฺธา, ตํ ๓- ปกาเสตฺวา อตฺถสํวณฺณนาย กรียมานาย ตตฺถ ตตฺถ คาถานํ อฏฺฐุปฺปตฺตึ ๔- วิภาเวตุํ สุกรา โหติ สุปากฏา จ, ตสฺมา ตํ ปกาเสตุํ อาทิโต ปฏฺฐาย สงฺเขปโต อยมนุปุพฺพิกถา:-

อยํ หิ โลกนาโถ "มนุสฺสตฺตํ ลิงฺคสมฺปตฺตี"ตฺยาทินา วุตฺตานิ อฏฺฐงฺคานิ สโมธาเนตฺวา ทีปงฺกรสฺส ภควโต ปาทมูเล กตมหาภินีหาโร ๕- สมตึสปารมิโย ปูเรนฺโต จตุวีสติยา พุทฺธานํ สนฺติเก ลทฺธพฺยากรโณ อนุกฺกเมน ปารมิโย ปูเรตฺวา ญาตตฺถจริยาย โลกตฺถจริยาย พุทฺธตฺถจริยาย ๖- จ โกฏึ ปตฺวา ตุสิตภวเน นิพฺพตฺติตฺวา ตตฺถ ยาวตายุกํ ฐตฺวา ทสสหสฺสจกฺกวาฬเทวตาหิ พุทฺธภาวาย:-

"กาโลยํ เต มหาวีร อุปฺปชฺช มาตุกุจฺฉิยํ