อิทานิ ตสฺสา "มยฺหํ อตฺโถ นตฺถี"ติ วทติ, ตํ สุตฺวา จาปา ขมาเปนฺตี "มา เม กุชฺฌี"ติ คาถมาห. ตตฺถ มา เม กุชฺฌีติ เกฬิกรณมตฺเตน มา มยฺหํ กุชฺฌิ. มหาวีร มหามุนีติ อุปกํ อาลปติ. ตํ หิ สา "ปุพฺเพปิ ปพฺพชิโต, อิทานิปิ ปพฺพชิตุกาโม"ติ กตฺวา ขนฺติญฺจ ปจฺจาสึสนฺตี "มหามุนี"ติ อาห. เตเนวาห "น หิ โกธปเรตสฺส, สุทฺธิ อตฺถิ กุโต ตโป"ติ, ตฺวํ เอตฺตกมฺปิ อสหนฺโต กถํ จิตฺตํ ทเมสฺสสิ, กถํ วา ตปํ จริสฺสสีติ อธิปฺปาโย.

@๕ สี. เกฬาปยิ

อถ นาฬํ คนฺตฺวา ชีวิตุกาโมสีติ จาปาย วุตฺโต อาห "ปกฺกมิสฺสญฺจ นาฬาโต, โกธ นาฬาย วจฺฉตี"ติ โก อิธ นาฬาย วสิสฺสติ, นาฬาโตว อหํ ปกฺกมิสฺสาเมว. โส หิ ตสฺส ชาตคาโม, ตโต นิกฺขมิตฺวา ปพฺพชิ, โส จ มคธรฏฺเฐ โพธิมณฺฑสฺส อาสนฺนปเทเส, ตํ สนฺธาย วุตฺตํ. พนฺธนฺตี อิตฺถิรูเปน, สมเณ ธมฺมชีวิโนติ จาเป ตฺวํ ธมฺเมน ชีวนฺเต ธมฺมิเก ปพฺพชิเต อตฺตโน อิตฺถิ- รูเปน อิตฺถิกุตฺตากปฺเปหิ พนฺธนฺตี ติฏฺฐสิ. เยนาหํ อิทานิ อีทิโส ชาโต, ตสฺมา ตํ ปริจฺจชามีติ อธิปฺปาโย.