อุตฺติฏฺฐปิณฺโฑติ วิวฏทฺวาเร ฆเร ฆเร ปติฏฺฐิตฺวา ลภนกปิณฺโฑ. อุญฺโฉติ ตทตฺถํ อุญฺฉาจริยา. อนคารูปนิสฺสโยติ อนคารานํ ปพฺพชิตานํ อุปคนฺตฺวา นิสฺสิตพฺพโต อุปนิสฺสยภูโต ปพฺพชิตปริกฺขาโร. ๒- ตํ หิ นิสฺสาย ปพฺพชิตา ชีวนฺติ.

วนฺตาติ ฉฑฺฑิตา. มเหสีหีติ พุทฺธาทีหิ มเหสีหิ. เขมฏฺฐาเนติ กามโยคาทีหิ อนุปทฺทวฏฺฐานภูเต นิพฺพาเน. เตติ มเหสโย. อจลํ สุขนฺติ นิพฺพาเน สุขํ ปตฺตา. ๓- ยสฺมา วนฺตกามา พุทฺธาทโย มเหสโย นิพฺพานสุขํ ปตฺตา. ๓- ตสฺมา ตํ ปตฺเถนฺเตน กามา ปริจฺจชิตพฺพาติ อธิปฺปาโย.

มาหํ กาเมหิ สงฺคจฺฉินฺติ อหํ กทาจิปิ กาเมหิ น สมาคจฺเฉยฺยํ. กสฺมาติ เจ อาห "เยสุ ตาณํ น วิชฺชตี"ติอาทึ, ๓- ตตฺถ เยสุ ตาณํ น วิชฺชตีติ ๓- เยสุ กาเมสุ อุปปริกฺขิยมาเนสุ เอกสฺมิมฺปิ อนตฺถปริตฺตาณํ นาม นตฺถิ. อคฺคิขนฺธูปมา มหาภิตาปฏฺเฐน. ทุขา ทุกฺขมฏฺเฐน. ๔-

อปริสุทฺโธ เอส สภโย ยทิทํ กามา นาม อวิทิตวิปุลานตฺถาวหตฺตา. สวิฆาโต จิตฺตวิฆาตกรณตฺตา. สกณฺฏโก วินิวิชฺฌนตฺตา. เคโธ สุวิสโม เจโสติ คิทฺธิเหตุตาย เคโธ. สุฏฺฐุ วิสโม มหาปลิโพโธ เอโส. ๕- ทุรติกฺกมนฏฺเฐน มหนฺโต. โมหนามุโข มุจฺฉาปตฺติเหตุโต.