ตตฺถ ชีวกมฺพวนนฺติ ชีวกสฺส โกมารภจฺจสฺส อมฺพวนํ. รมฺมนฺติ รมณียํ. ตํ กิร ภูมิภาคสมฺปตฺติยา ฉายูทกสมฺปตฺติยา จ รุกฺขานํ โรปิตากาเรน อติวิย มนุญฺญํ มโนรมํ. คจฺฉนฺตินฺติ อมฺพวนํ อุทฺทิสฺส คตํ, ทิวาวิหาราย อุปคจฺฉนฺตึ. สุภนฺติ เอวํนามิกํ. ธุตฺตโกติ อิตฺถิธุตฺโต. ราชคหวาสี กิเรโก มหาวิภวสฺส สุวณฺณการสฺส ปุตฺโต ยุวา อภิรูโป อิตฺถิธุตฺโต ปุริโส มตฺโต ๑- วิจรติ. โส ตํ ปฏิปเถ ทิสฺวา ปฏิพทฺธจิตฺโต มคฺคํ อุปรุนฺธิตฺวา อฏฺฐาสิ. เตน วุตฺตํ "ธุตฺตโก สนฺนิวาเรสี"ติ, มม คมนํ นิเสเธสีติ อตฺโถ. ตเมนํ อพฺรวี สุภาติ ตเมนํ นิวาเรตฺวา ฐิตํ ธุตฺตํ สุภา ภิกฺขุนี กเถสิ. เอตฺถ จ "คจฺฉนฺตึ ภิกฺขุนึ สุภํ, อพฺรวี สุภา"ติ จ อตฺตานเมว เถรี อญฺญํ วิย กตฺวา วทติ. เถริยา วุตฺตคาถานํ สมฺพนฺธทสฺสนวเสน สงฺคีติกาเรหิ อยํ คาถา วุตฺตา.
"อพฺรวี สุภา"ติ วตฺวา ตสฺสา วุตฺตาการทสฺสนตฺถํ อาห "กึ เต อปราธิตนฺ"ติ- อาทึ. ตตฺถ ยํ มํ โอวริยาน ติฏฺฐสีติ เยน อปราเธน มํ คจฺฉนฺตึ โอวริตฺวา คมนํ นิเสเธตฺวา ติฏฺฐสิ, โส นตฺเถวาติ อธิปฺปาโย. อถ อิตฺถีติสญฺญาย เอวํ ปฏิปชฺชสิ, เอวมฺปิ น ยุตฺตนฺติ ทสฺเสนฺตี อาห "น หิ ปพฺพชิตาย อาวุโส, ปุริโส สมฺผุสนาย กปฺปตี"ติ, อาวุโส สุวณฺณการปุตฺต โลกิยจาริตฺเตนปิ ปุริสสฺส ปพฺพชิตานํ สมฺผุสนาย น กปฺปติ, ปพฺพชิตาย ปน ปุริโส ติรจฺฉานคโตปิ สมฺผุสนาย น กปฺปติ, ติฏฺฐตุ ตาว ปุริสผุสนา, ๒- ราควเสนสฺสา นิสฺสคฺคิเยน ปุริสสฺส นิสฺสคฺคิยสฺสาปิ ผุสนา น กปฺปเตว.
เตนาห "ครุเก มม สตฺถุสาสเน"ติอาทึ. ตสฺสตฺโถ:- ครุเก ปาสาณจฺฉตฺตํ วิย ครุกาตพฺเพ มยฺหํ สตฺถุ สาสเน ยา สิกฺขา ภิกฺขุนิโย อุทฺทิสฺส สุคเตน สมฺมาสมฺพุทฺเธน เทสิตา ปญฺญตฺตา. ตาหิ ปริสุทฺธปทํ ปริสุทฺธกุสลโกฏฺฐาสํ ราคาทิองฺคณานํ สพฺพโส อภาเวน อนงฺคณํ เอวํภูตํ มํ คจฺฉนฺตึ เกน การเณน อาวริตฺวา ติฏฺฐสีติ.