อาวิลจิตฺโตติ จิตฺตสฺส อาวิลภาวกรานํ กามวิตกฺกาทีนํ วเสน อาวิลจิตฺโต ตฺวํ ตทภาวโต อนาวิลํ ราครชาทีนํ วเสน สรโช สางฺคโณ ตทภาวโต วีตรชํ อนงฺคณํ สพฺพตฺถ ขนฺธปญฺจเก สมุจฺเฉทวิมุตฺติยา วิมุตฺตมานสํ มํ กสฺมา โอวริตฺวา ติฏฺฐสีติ.

เอวํ เถริยา วุตฺเต ธุตฺตโก อตฺตโน อธิปฺปายํ วิภาเวนฺโต "ทหรา จา"ติอาทินา ทส คาถา อภาสิ. ตตฺถ ทหราติ ตรุณี ปฐเม โยพฺพเน ฐิตา. อปาปิกา จสีติ รูเปน อลามิกา จ อสิ, อุตฺตมรูปธรา จาโหสีติ อธิปฺปาโย. กึ เต ปพฺพชฺชา กริสฺสตีติ ตุยฺหํ เอวํ ปฐมวเย ฐิตาย รูปสมฺปนฺนาย ปพฺพชฺชา กึ กริสฺสติ, วุฑฺฒาย พีภจฺฉรูปาย วา ปพฺพชิตพฺพนฺติ อธิปฺปาเยน วทติ. นิกฺขิปาติ ฉฑฺเฑหิ. "อุกฺขิปา"ติ วา ปาโฐ, อปเนหีติ อตฺโถ.

มธุรนฺติ สุภํ, สุคนฺธนฺติ อตฺโถ. ปวนฺตีติ วายนฺติ. สพฺพโสติ สมนฺตโต. กุสุมรเชน สมุฏฺฐิตา ทุมาติ อิเม รุกฺขา มนฺทวาเตน สมุฏฺฐหมานกุสุมเรณุชาเตน อตฺตโน กุสุมรเชน สยํ สมุฏฺฐิตา วิย หุตฺวา สมนฺตโต สุรภี วายนฺติ. ปฐมวสนฺโต สุโข อุตูติ อยํ ปฐโม วสนฺตมาโส สุขสมฺผสฺโส จ อุตุ วตฺตตีติ อตฺโถ.

กุสุมิตสิขราติ สุปุปฺผิตคฺคา. อภิคชฺชนฺติว มารุเตริตาติ วาเตน สญฺจลิตา อภิคชฺชนฺติว อภิตฺถนิตา ๑- วิย ติฏฺฐนฺติ. ยทิ เอกา วนโมคหิสฺสสีติ สเจ ตฺวํ