อกฺขาตา อนฺตรายิกาติ "สคฺคมคฺคาธิคมสฺส นิพฺพานคามิมคฺคสฺส จ อนฺตรายกรา"ติ จกฺขุภูเตหิ พุทฺธาทีหิ วุตฺตา. คจฺฉถาติ อนิกรตฺตํ สปริสํ วิสฺสชฺเชติ.

กึ มม ปโร กริสฺสตีติ ปโร อญฺโญ มม กึ นาม หิตํ กริสฺสติ อตฺตโน สีสมฺหิ อุตฺตมงฺเค เอกาทสหิ อคฺคีหิ ฑยฺหมาเน. เตนาห "อนุพนฺเธ ชรามรเณ"ติ. ตสฺส ชรามรณสฺส สีสฑาหสฺส ฆาตาย สมุคฺฆาตาย ฆฏิตพฺพํ วายมิตพฺพํ.

ฉมนฺติ ฉมายํ. อิทมโวจนฺติ อิทํ "ทีโฆ พาลานํ สํสาโร"ติอาทิกํ สํเวค- สํวตฺตนกํ วจนํ อโวจํ.

ทีโฆ พาลานํ สํสาโรติ กิเลสกมฺมวิปากวฏฺฏภูตานํ ขนฺธายตนาทีนํ ปฏิปาฏิปวตฺติสงฺขาโต สํสาโร อปริญฺญาตวตฺถุกานํ อนฺธพาลานํ ทีโฆ พุทฺธญาเณนปิ อปริจฺฉินฺทนิโย. ยถา หิ อนุปจฺฉินฺนตฺตา อวิชฺชาตณฺหานํ อปริจฺฉินฺนตฺตาเยว ภวปพนฺธสฺส ปุพฺพา โกฏิ น ปญฺญายติ, เอวํ ปราปิ โกฏีติ. ปุนปฺปุนญฺจ โรทตนฺติ อปราปรํ โสกวเสน รุทนฺตานํ. อิมินาปิ อวิชฺชาตณฺหานํ อนุปจฺฉินฺนตํเยว เตสํ วิภาเวติ.