165. 8. Jambugāmikaputtattheragāthāvaṇṇanā

kacci no vatthapasutoti āyasmato jambugāmikaputtattherassa gāthā. Kā uppatti?

so kira purimabuddhesu katādhikāro hutvā tattha tattha vivaṭṭūpanissayaṃ kusalaṃ ācinanto ito ekatiṃse kappe vessabhussa bhagavato kāle ekadivasaṃ kiṃsukāni pupphāni disvā tāni pupphāni gahetvā buddhaguṇe anussaranto bhagavantaṃ uddissa ākāse khipanto pūjesi. So tena puññakammena tāvatiṃsesu nibbatto. Tato paraṃ puññāni katvā aparāparaṃ devamanussesu saṃsaranto imasmiṃ buddhuppāde campāyaṃ jambugāmikassa nāma upāsakassa putto hutvā nibbatti. Tenassa jambugāmika- puttotveva samaññā ahosi. So vayappatto bhagavato santike dhammaṃ sutvā paṭiladdhasaṃvego pabbajitvā katapubbakicco kammaṭṭhānaṃ gahetvā sākete añjanavane vasati. Athassa pitā "kiṃ nu kho mama putto sāsane abhirato viharati, udāhu no"ti vīmaṃsanatthaṃ "kacci no vatthapasuto"ti gāthaṃ likhitvā pesesi. So taṃ vācetvā "pitā me pamādavihāraṃ āsaṅkati, ahañca ajjāpi puthujjanabhūmiṃ nātivatto"ti saṃvegajāto ghaṭento vāyamanto na cirasseva chaḷabhiñño ahosi. Tena vuttaṃ apadāne 2-:-

"kiṃsukaṃ pupphitaṃ disvā paggahetvāna añjaliṃ