Arahattaṃ pana patvā ñātīnaṃ vasananagaraṃ gantvā sāsanassa niyyānikabhāvaṃ pakāsento iddhipāṭihāriyaṃ dassesi. Taṃ disvā ñātakā pasannamānasā bahū saṃghārāme kāresuṃ. Theropi sakapitarā pesitaṃ gāthaṃ aṅkusaṃ katvā ghaṭento vāyamanto arahattaṃ sacchākāsi. Aññaṃ byākarontopi pitupūjanatthaṃ 1-:-

2- "kacci no vatthapasuto kacci no bhūsanārato

kacci sīlamayaṃ gandhaṃ tvaṃ vāyasi netarā pajā"ti tameva gāthaṃ abhāsi.

[28] Tattha kaccīti pucchāyaṃ nipāto. Noti paṭisedhe. Vatthapasutoti vatthe pasuto vatthapasuto, cīvaramaṇḍanābhirato. Nidassanamattaṃ cetaṃ pattamaṇḍanādi- cāpallapaṭikkhepassāpi adhippetattā. "kacci na vatthapasuto"tipi pāṭho, so evamattho. Bhūsanāratoti attabhāvavibhūsanāya rato abhirato, yathekacce pabbajitvāpi capalā kāya- daḷhibahulā cīvarādiparikkhārassa attano sarīrassa ca maṇḍanavibhūsanaṭṭhānāya yuttā honti. Kimeva parikkhārapasuto bhūsanārato ca nāhosīti ayamettha padadvayassāpi attho. Sīlamayaṃ gandhanti akhaṇḍādibhāvāpādanena suparisuddhassa catubbidhassapi sīlassa vasena yvāyaṃ "yo ca sīlavataṃ gandho, vāti devesu uttamo"ti vutto sīlamayo gandho, taṃ tvaṃ vāyasi sīlasampattisambhavena kalyāṇena kittisaddena kiṃ tvaṃ sabbā disā pattharasīti attho. Netarā pajāti na itarā dussīlapajā, dussīlattāyeva dussilyamayaṃ duggandhaṃ vāyati, na sīlmayaṃ gandhaṃ evaṃ tvaṃ duggandhaṃ avāyitvā