apihā nūna mayipi vanatho te na vijjati.

[339] Pariyantakataṃ dukkhaṃ antimoyaṃ samussayo

jātimaraṇasaṃsāro natthi dāni punabbhavo"ti imā gāthā abhāsi.

Tattha sādhū hi kira me mātā, patodaṃ upadaṃsayīti sādhu vata mātā mayhaṃ ovādasaṅkhātaṃ patodaṃ dasseti, tena me viriyaṃ uttejentī uttamaṅge paññāsīse vijjhi. Yassāti yassā me mātuyā. Sambodhinti arahattaṃ. Ayaṃ hettha yojanā:- janettiyā me anusiṭṭho yassā anusāsanībhūtaṃ vacanaṃ sutvā ahaṃ āraddhaviriyo pahitatto viharanto uttamaṃ aggaphalaṃ sambodhiṃ arahattaṃ patto.