Sīlaṃ balaṃ appaṭimanti mārasenappamaddane asadisaṃ balaṃ senāthāmo ca. Āvudha- muttamanti saṅkilesadhammānaṃ chedane uttamaṃ paharaṇaṃ. Guṇasarīropasobhaṇaṭṭhena ābharaṇaṃ. Seṭṭhanti sabbakālaṃ uttamaṃ dabbañca. Sapāṇaparittānato kavacamabbhutaṃ. "abbhidan"ti ca paṭhanti, abhejjanti attho.

Apāyamahoghātikkamane saṃsāramahoghātikkamane ca kilesehi asaṃsīdanaṭṭhena setu. Mahesakkhoti mahabbalo. Gandho anuttaroti paṭivātaṃ sabbadisāsu vāyanato anuttaro gandho sabbajanamanoharattā. Tenāha "yena vāti disodisanti, yena sīlagandhena taṃsamaṅgī disodisaṃ sabbā disā vāyati. Disodisātipi pāli, dasa disāti attho.

@jaṭāsutta, (khu.netti. 10/197, khu.milinda. 11/33 (cha.Ma.)