Ḍayhamānesūti rāgaggiādīhi ekādasahi aggīhi sattesu ḍayhamānesu. Saṅkilesa- pariḷāhābhāvena nibbuto sītibhūto.

Puna manussehi "kiṃ bhante jiṇṇakālepi araññapabbateyeva viharatha, nanu ime veḷuvanādayo vihārā manoramā"ti vutte araññapabbatā eva mayhaṃ manoramāti dassento "karerimālāvitatā"tiādikā dvādasa gāthā abhāsi. Tattha karerimālāvitatāti Varuṇarukkhapantīhi samāgatā. "kālavaṇṇapupphehi otthaṭā"tipi vadanti. Kuñjarā- bhirudāti paṭighosādiguṇībhūtehi hatthīnaṃ gocaresīnaṃ gajjitehi abhitthanitā.

Abhivuṭṭhāti mahāmeghena abhippavuṭṭhā. Rammatalāti teneva rajojallapaṇṇeyyādīnaṃ apagamena ramaṇīyatalā. Nagāti desantaraṃ agamanato "nagā"ti selamayatāya "selā"ti ca laddhanāmā pabbatā. Abbhunnaditā sikhībhīti madhurassarena unnaditā.

Alanti yuttaṃ samatthaṃ vā. Jhāyitukāmassa atthakāmassātiādīsupi iminā nayena yojetabbaṃ. Bhikkhunoti bhinnakilesabhikkhuno, meti sambandho.