[1287] Addasa bhagavā ādiṃ upādānassa kappiyo

accagā vata kappāno maccudheyyaṃ suduttaraṃ.

[1288] Taṃ devadevaṃ vandāmi puttaṃ te dvipaduttama

anujātaṃ mahāvīraṃ nāgaṃ nāgassa orasan"ti imā gāthā saṅgītikāle ekajjhaṃ katvā saṅgahaṃ āropitā. Tattha "nikkhantaṃ vata maṃ santan"tiādayo pañca gāthā āyasmā vaṅgīso navo acirapabbajito hutvā vihāraṃ upagatā alaṅkatapaṭiyattā sambahulā itthiyo disvā uppannarāgo taṃ vinodento abhāsi.