@5 Ma. parikirante 6 Sī. viddhaṃseyyunti Kareyyaṃ. Nibbanatho avanatho sa bhikkhūti yo hi sabbena sabbaṃ nittaṇho, tato eva katthacipi nandiyā abhāvato avanatho, so bhikkhu nāma saṃsāre bhayassa sammadeva ikkhaṇatāya bhinnakilesatāya cāti attho.

Yamidha paṭhaviñca vehāsaṃ, rūpagataṃ jagatogadhaṃ kiñcīti yaṅkiñci idha paṭhavīgataṃ bhūminissitaṃ vehāsaṃ vehāsaṭṭhaṃ devalokanissitaṃ rūpagataṃ rūpajātaṃ ruppanasabhāvaṃ jagatogadhaṃ lokikaṃ bhavattayapariyāpannaṃ saṅkhataṃ. Parijiyyati sabbamaniccanti sabbaṃ taṃ jarābhibhūtaṃ, tato eva aniccaṃ tato eva dukkhaṃ anattāti evaṃ tilakkhaṇāropanaṃ āha. Ayaṃ therassa vipassanāti vadanti. Evaṃ samecca caranti mutattāti evaṃ samecca abhisamecca vipassanāpaññāsahitāya maggapaññāya paṭivijjhitvā mutattā pariññātattabhāvā paṇḍitā caranti viharanti.

Upadhīsūti khandhūpadhiādīsu. Janāti andhaputhujjanā. Gadhitāseti paṭibaddhacittā. Ettha hi visesato kāmaguṇūpadhīsu chando apanetabboti dassento āha diṭṭhasute paṭighe ca mute cāti. Diṭṭhasuteti diṭṭhe ceva sute ca, rūpasaddesūti attho. Paṭigheti ghaṭṭite phoṭṭhabbe. Muteti vuttāvasese mute, gandharasesūti vuttaṃ hoti. Sāratthapakāsaniyaṃ "paṭighapadena gandharasā gahitā, mutapadena phoṭṭhabbārammaṇan"ti vuttaṃ. Ettha vinodaya chandamanejoti etasmiṃ diṭṭhādibhede pañcakāmaguṇe kāmacchandaṃ vinodehi, tathā sati sabbattha anejo avikappo bhavasi. Yo hettha na lippati muni tamāhūti yo hi ettha kāmaguṇe taṇhālepena na lippati, taṃ moneyyadhammaṭṭhattā "munī"ti paṇḍitā vadanti. "atha saṭṭhisitā"ti pālīti adhippāyena keci "saṭṭhidhammārammaṇa- nissitā"ti atthaṃ vadanti. "aṭṭhasaṭṭhisitā savitakkā"ti pana pāli, appakaṃ hi ūnaṃ adhikaṃ vā na gaṇanūpagaṃ hotīti. Aṭṭhasaṭṭhisitāti dvāsaṭṭhidiṭṭhigata- sannissitā micchāvitakkāti atthoti keci vadanti, diṭṭhigatikā ca sattāvāsābhāvaladdhiṃ ajjhūpagatāti