Tattha saṅkhittenapīti "cattārimāni āvuso ariyasaccāni. Katamāni cattāri? Dukkhaṃ ariyasaccaṃ .pe. Imāni kho āvuso cattāri ariyasaccāni, tasmā tihāvuso idaṃ dukkhanti yogo karaṇīyo "ti evaṃ saṅkhittenapi deseti. "katamañcāvuso dukkhaṃ ariyasaccaṃ jātipi dukkhā"tiādinā nayena tāneva vibhajanto vitthārenapi bhāsati. Khandhādidesanāsupi eseva nayo. Sālikāyiva nigghosoti yathā madhuraṃ ambapakkaṃ sāyitvā pakkhehi vātaṃ datvā madhuraravaṃ nicchārentiyā sālikāya nigghoso, evaṃ therassa dhammaṃ kathentassa madhuro nigghoso hoti. Dhammasenāpatissa hi pittādīnaṃ vasena apalibuddhavacanaṃ hoti, ayadaṇḍena pahaṭakaṃsatālako viya saddo niccharati. Paṭibhāṇaṃ udiyyatīti kathetukamyatāya sati samuddato vīciyo viya uparūpari anantaṃ paṭibhāṇaṃ uṭṭhahati.

Tassāti dhammasenāpatissa. Tanti dhammaṃ desentassa. Suṇantāti yaṃ no thero katheti, taṃ no sossāmāti ādarajātā suṇantā. Madhuranti iṭṭhaṃ. Rajanīyenāti kantena. Savanīyenāti kaṇṇasukhena. Vaggunāti maṭṭhena manoharena. Udaggacittāti odagyapītiyā vasena udaggacittā alīnacittā. Muditāti āmoditā pāmojjena samannāgatā. Odhentīti avadahanti aññāya cittaṃ upaṭṭhapentā sotaṃ upanenti.

@3 Ma.upari. 14/373/317 saccavibhaṅgasutta 4 Sī.,Ma. tāḷaṃ