Ummaggapathantiādikā catasso gāthā bhagavatā "kiṃ nu te vaṅgīsa imā gāthāyo pubbe parivitakkitā, udāhu ṭhānaso cetā paṭibhantī"ti pucchitena ṭhānaso paṭibhantīti dassentena vuttā, kasmā panevaṃ taṃ bhagavā avoca? saṃghamajjhe kira kathā udapādi "vaṅgīsatthero vissaṭṭhagantho neva uddesena, na paripucchāya, na yonisomanasikārena kammaṃ karoti. Kathaṃ bandhanto vaṇṇapadāni karonto vicaratī"ti. Atha bhagavā "ime bhikkhū vaṅgīsassa paṭibhāṇasampattiṃ na jānanti, ahamassa paṭibhāṇasampattiṃ jānāpessāmī"ti cintetvā "kiṃ nu kho vaṅgīsā"tiādinā pucchati. Ummaggapathanti anekāni kilesuppajjanapathāni. Vaṭṭappasutapathatāya hi pathanti vuttaṃ. Pabhijja khīlānīti rāgādikhīlāni pañca bhinditvā carasi. Taṃ passathāti taṃ evaṃ abhibhuyya ca chinditvā ca carantaṃ buddhaṃ passatha. Bandhapamuñcakaranti bandhanamocanakaraṃ. Asitanti anissitaṃ. Bhāgaso paṭibhajjāti satipaṭṭhānādikoṭṭhāsato dhammaṃ paṭibhajjanīyaṃ katvā. Pavibhajjātipi pāṭho, uddesādikoṭṭhāsato pakārena vibhajitvā vibhajitvā dhammaṃ desetīti attho.

@4 Sī. kilesummujanapathāni 5 cha.Ma. ayaṃ pāṭho na dissati 6 Ma. bandhanapamuñcakaraṃ

Oghassāti kāmādicaturoghassa. Anekavihitanti satipaṭṭhānādivasena anekavidhaṃ aṭṭhatiṃsāya vā kammaṭṭhānaṃ vasena anekappakāraṃ amatāvahaṃ maggaṃ akkhāsi abhāsi. Tasmiṃ ca amate akkhāteti tasmiṃ tena akkhāte amate amatāvahe. Dhammadasāti dhammassa passitāro. Ṭhitā asaṃhīrāti kenaci asaṃhāriyā hutvā patiṭṭhitā. Ativijjhāti ativijjhitvā. Sabbaṭhitīnanti sabbesaṃ diṭṭhiṭṭhānānaṃ viññāṇaṭṭhitīnaṃ vā. Atikkamamaddasāti atikkamabhūtaṃ nibbānaṃ addasa. Agganti uttamaṃ dhammaṃ. Aggeti vā pāṭho, paṭhamataranti attho. Dasaddhānanti pañcavaggiyānaṃ aggaṃ dhammaṃ agge vā ādito desayīti attho.