Uttiṭṭhapiṇḍoti vivaṭadvāre ghare ghare patiṭṭhitvā labhanakapiṇḍo. Uñchoti tadatthaṃ uñchācariyā. Anagārūpanissayoti anagārānaṃ pabbajitānaṃ upagantvā nissitabbato upanissayabhūto pabbajitaparikkhāro. Taṃ hi nissāya pabbajitā jīvanti.

Vantāti chaḍḍitā. Mahesīhīti buddhādīhi mahesīhi. Khemaṭṭhāneti kāmayogādīhi anupaddavaṭṭhānabhūte nibbāne. Teti mahesayo. Acalaṃ sukhanti nibbāne sukhaṃ pattā. Yasmā vantakāmā buddhādayo mahesayo nibbānasukhaṃ pattā. Tasmā taṃ patthentena kāmā pariccajitabbāti adhippāyo.

Māhaṃ kāmehi saṅgacchinti ahaṃ kadācipi kāmehi na samāgaccheyyaṃ. Kasmāti ce āha "yesu tāṇaṃ na vijjatī"tiādiṃ, tattha yesu tāṇaṃ na vijjatīti yesu kāmesu upaparikkhiyamānesu ekasmimpi anatthaparittāṇaṃ nāma natthi. Aggikhandhūpamā mahābhitāpaṭṭhena. Dukhā dukkhamaṭṭhena.

Aparisuddho esa sabhayo yadidaṃ kāmā nāma aviditavipulānatthāvahattā. Savighāto cittavighātakaraṇattā. Sakaṇṭako vinivijjhanattā. Gedho suvisamo cesoti giddhihetutāya gedho. Suṭṭhu visamo mahāpalibodho eso. Duratikkamanaṭṭhena mahanto. Mohanāmukho mucchāpattihetuto.