Tathā apadānepi:-

"āyācito tadā āha ehi bhaddeti nāyako

tadāhaṃ upasampannā parittaṃ toyamaddasan"ti taṃ kathanti. Nayidaṃ ehibhikkhunibhāvena upasampadaṃ sandhāya vuttaṃ. Upasampadāya pana hetubhāvato yā satthu āṇatti, sā me āsūpasampadāti vuttaṃ.

Tathā hi vuttaṃ aṭṭhakathāyaṃ "ehi bhadde bhikkhunupassayaṃ gantvā bhikkhunīnaṃ santike pabbajja upasampajjassūti maṃ avoca āṇāpesi. Sā satthu āṇā mayhaṃ upasampadāya kāraṇattā upasampadā ahosī"ti. Eteneva apadānagāthāyapi attho saṃvaṇṇitoti daṭṭhabbo.