Anugghātīti na ugghāti, attano upari nisinnānaṃ īsakampi khobhaṃ akarontoti attho. Mitanti nimmitaṃ, nikkhepapadaṃ vītikkamanti attho. Ayaṃ hettha attho "vaggu cāru padanikkhepaṃ katvā gacchatī"ti. Mitanti vā parimitaṃ pamāṇayuttaṃ, nātisīghaṃ nātisaṇikanti vuttaṃ hoti. Vāraṇoti hatthī. So hi paccatthikavāraṇato gamanaparikkilesavāraṇato ca "vāraṇo"ti vuccati.

Tassattho:- yathā nāma ātataṃ vitataṃ ātatavitataṃ ghanaṃ susiranti evaṃ pañcaṅgike tūriye kusalehi vādiyamāne ṭhānuppattiyā mandatāravibhāgaṃ dassentena gāyantena samīrito vāditasaro vaggu rajanīyo nigghoso suyyati, evaṃ tesaṃ soṇṇakaṃsānaṃ tapanīyaghaṇḍānaṃ nigghoso suyyatīti.