[๔๕๓] |๔๕๓.๑๓๙| ๓ ทหรา ตุวํ รูปวตี อหํปิ ทหโร ยุวา ปญฺจงฺคิเกน ตุริเยน เอหิ เขเม รมามเส ฯ |๔๕๓.๑๔๐| อิมินา ปูติกาเยน อาตุเรน ปภงฺคุนา อฏฺฏิยามิ หรายามิ กามตณฺหา สมูหตา ฯ |๔๕๓.๑๔๑| สตฺติสูลูปมา กามา ขนฺธาสํ อธิกุฏฺฏนา ยํ ตฺวํ กามรตึ พฺรูสิ อรติ ทานิ สา มมํ ฯ |๔๕๓.๑๔๒| สพฺพตฺถ วิหตา นนฺทิ ตโมกฺขนฺโธ ปทาลิโต เอวํ ชานาหิ ปาปิม นิหโต ตฺวมสิ อนฺตก ฯ |๔๕๓.๑๔๓| นกฺขตฺตานิ นมสฺสนฺตา อคฺคึ ปริจรํ วเน ยถาภุจฺจมชานนฺตา พาลา สุทฺธึ อมญฺญถ ฯ |๔๕๓.๑๔๔| อหญฺจ โข นมสฺสนฺตี สมฺพุทฺธํ ปุริสุตฺตมํ ปริมุตฺตา ๑- สพฺพทุกฺเขหิ สตฺถุสาสนการิกา ฯ เขมา ฯ @เชิงอรรถ: ๑ โป. ม. ปมุตฺตา ฯ