TIPITAKA Volume 26 : PALI ROMAN Sutta Pitaka Vol 18 : Sutta. Khu. vimāna-petavatthu thera-therīgāthā

[107] |107.314| 10 Divāvihāragataṃ bhikkhuṃ gaṅgātīre nisinnakaṃ taṃ petī upasaṅkamma dubbaṇṇā bhīrudassanā |107.315| kesā cassā atidīghā yāva bhummāvalambare kesehi sā paṭicchannā samaṇaṃ etamabrūvīti. |107.316| Pañcapaṇṇāsavassāni yato kālakatā ahaṃ nābhijānāmi bhuttaṃ vā pītaṃ vā pana pānīyaṃ dehi tvaṃ pānīyaṃ bhante tasitā pānīyāya meti. |107.317| Ayaṃ sītodakā gaṅgā himavantato sandati piva etto gahetvāna kiṃ maṃ yācasi pānīyaṃ (iti). |107.318| Sacāhaṃ bhante gaṅgāya sayaṃ gaṇhāmi pānīyaṃ lohitaṃ me parivattati tasmā yācāmi pānīyaṃ (iti). |107.319| Kinnu kāyena vācāya manasā dukkaṭaṃ kataṃ kissa kammavipākena gaṅgā te hoti lohitaṃ (iti). |107.320| Putto me uttaro nāma saddho āsi upāsako So ca mayhaṃ akāmāya samaṇānaṃ pavecchati |107.321| cīvaraṃ piṇḍapātañca paccayaṃ sayanāsanaṃ. Tamahaṃ paribhāsāmi maccherena upaddutā |107.322| yantaṃ mayhaṃ akāmāya samaṇānaṃ pavecchasi cīvaraṃ piṇḍapātañca paccayaṃ sayanāsanaṃ. |107.323| Etante paralokasmiṃ lohitaṃ hotu uttara tassa kammavipākena gaṅgā me hoti lohitanti. Uttaramātupetivatthu dasamaṃ.