TIPITAKA Volume 26 : PALI ROMAN Sutta Pitaka Vol 18 : Sutta. Khu. vimāna-petavatthu thera-therīgāthā

[22] |22.207| 5 Nīlā pītā ca kāḷā ca mañjiṭṭhā atha lohitā uccāvacānaṃ vaṇṇānaṃ kiñjakkhaparivāritā |22.208| mandāravānaṃ pupphānaṃ mālaṃ dhāresi muddhani nayime aññesu kāyesu rukkhā santi sumedhase |22.209| kena kāyaṃ upapannā tāvatiṃsaṃ yasassinī devate pucchitācikkha kissa kammassidaṃ phalaṃ (iti). |22.210| Bhadditthikāti maṃ aññiṃsu kimbilāyaṃ upāsikā saddhāsīlena sampannā saṃvibhāgaratā sadā |22.211| acchādanañca bhattañca senāsanaṃ padīpiyaṃ adāsiṃ ujubhūtesu vippasannena cetasā |22.212| Cātuddasiṃ pañcadasiṃ yā ca pakkhassa aṭṭhamī pāṭihāriyapakkhañca aṭṭhaṅgasusamāgataṃ uposathaṃ upavasiṃ sadā sīle susaṃvutā |22.213| pāṇātipātā viratā musāvādā ca saññatā theyyā ca aticārā ca majjapānā ca ārakā |22.214| pañcasikkhāpade ratā ariyasaccāna kovidā upāsikā cakkhumato appamādavihārinī katāvakāsā katakusalā tato cutā sayampabhā anuvicarāmi nandanaṃ |22.215| bhikkhū cāhaṃ paramahitānukampake abhojayiṃ tapassiyugaṃ mahāmuniṃ katāvakāsā katakusalā tato cutā sayampabhā anuvicarāmi nandanaṃ |22.216| aṭṭhaṅgikaṃ aparimitaṃ sukhāvahaṃ uposathaṃ sattatamupāvasiṃ ahaṃ katāvakāsā katakusalā tato cutā sayampabhā anuvicarāmi nandananti. Bhadditthikāvimānaṃ pañcamaṃ.