TIPITAKA Volume 26 : PALI ROMAN Sutta Pitaka Vol 18 : Sutta. Khu. vimāna-petavatthu thera-therīgāthā Theragāthāya dasakanipāto

[370] |370.527| 1 Aṅgārinodāni dumā bhadante phalesino chadanaṃ vippahāya te accimantova pabhāsayanti samayo mahāvīra bhagī 2- rasānaṃ. @Footnote: 1 Ma. vītakhilova . 2 Ma. bhāgī. |370.528| Dumāni phullāni manoramāni samantato sabbadisā pavanti pattaṃ pahāya phalamāsasānā kālo ito pakkamanāya vīra. |370.529| Nevātisītaṃ na panātiuṇhaṃ sukhā utu addhaniyā bhadante passantu taṃ sākiyā koḷiyā ca pacchāmukhaṃ rohiṇiyaṃ tarantaṃ. |370.530| Āsāya kasate khettaṃ bījaṃ āsāya vappati āsāya vāṇijā yanti samuddaṃ dhanahārakā. Yāya āsāya tiṭṭhāmi sā me āsā vipaccatu 1- . |370.531| Punappunañceva vapanti bījaṃ punappunaṃ vassati devarājā punappunaṃ khettaṃ kasanti kassakā punappunaṃ dhaññamupeti raṭṭhaṃ. |370.532| Punappunaṃ yācanakā caranti punappunaṃ dānapatī dadanti punappunaṃ dānapatī daditvā punappunaṃ saggamupenti ṭhānaṃ. @Footnote: 1 Ma. Yu. samijjhatu. |370.533| Dhīro 1- have sattayugaṃ puneti yasmiṃ kule jāyati bhūripañño maññāmahaṃ sakkati devadevo tayā hi jāto muni saccanāmo. |370.534| Suddhodano nāma pitā mahesino buddhassa mātā pana māyā 2- mahesī yā bodhisattaṃ parihariya kucchinā kāyassa bhedā tidivasmi modati. |370.535| Sā gotamī kālakatā ito cutā dibbehi kāmehi samaṅgibhūtā sā modati kāmaguṇehi pañcahi parivāritā devagaṇehi tehi. |370.536| Buddhassa puttomhi asayhasāhino aṅgīrasassappaṭimassa tādino pitu pitā mayhaṃ tuvaṃsi sakka dhammena me gotama ayyakosīti. Kāḷudāyī thero.