TIPITAKA Volume 26 : PALI ROMAN Sutta Pitaka Vol 18 : Sutta. Khu. vimāna-petavatthu thera-therīgāthā

[454] |454.145| 4 Alaṅkatā suvasanā mālinī candanokkhitā sabbābharaṇasañchannā dāsīgaṇapurakkhatā. |454.146| Annaṃ pānaṃ ca ādāya khajjaṃ bhojjaṃ anappakaṃ gehato nikkhamitvāna uyyānamabhihārayiṃ. |454.147| Tattha ramitvā kīḷitvā āgacchantī sakaṃ gharaṃ vihāraṃ dakkhiṃ pāvisiṃ sākete añjanaṃ vanaṃ. |454.148| Disvāna lokapajjotaṃ vanditvāna upāvisiṃ so me dhammamadesesi anukampāya cakkhumā. |454.149| Sutvā ca kho mahesissa saccaṃ sampaṭivijjhahaṃ tattheva virajaṃ dhammaṃ phusayiṃ amataṃ padaṃ. |454.150| Tato viññātasaddhammā pabbajiṃ anagāriyaṃ tisso vijjā anuppattā amoghaṃ buddhasāsanaṃ. Sujātā.