TIPITAKA Volume 26 : PALI ROMAN Sutta Pitaka Vol 18 : Sutta. Khu. vimāna-petavatthu thera-therīgāthā

[359] |359.447| 13 Channamativassati vivaṭaṃ nātivassati tasmā channaṃ vivaretha evantaṃ nātivassati. |359.448| Maccunabbhāhato loko jarāya parivārito taṇhāsallena otiṇṇo icchādhūpāyito sadā. |359.449| Maccunabbhāhato loko parikkhitto jarāya ca haññati niccamattāṇo pattadaṇḍova takkaro. |359.450| Āgacchantaggikkhandhāva maccubyādhijarā tayo paccuggantuṃ balaṃ natthi javo natthi palāyituṃ. |359.451| Amoghaṃ divasaṃ kayirā appena bahukena vā yaṃ yaṃ vivahate 1- ratti tadūnantassa jīvitaṃ. |359.452| Carato tiṭṭhato vāpi āsīnasayanassa vā upeti carimā ratti na te kālo pamajjitunti. Sirimaṇḍo thero.