๙ มฆเทวชาตกํ

อุตฺตมงฺครุหา มยฺหนฺติ อิทํ สตฺถา เชตวเน วิหรนฺโต มหาภินิกฺขมนํ อารพฺภ กเถสิ ฯ ตํ เหฏฺฐา นิทานกถาย กถิตเมว ฯ ตสฺมึ ปน กาเล ภิกฺขู ทสพลสฺส เนกฺขมฺมํ วณฺณยนฺตา นิสีทึสุ ฯ อถ สตฺถา ธมฺมสภํ อาคนฺตฺวา พุทฺธาสเน นิสินฺโน ภิกฺขู อามนฺเตตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิ ฯ ภนฺเต น อญฺญาย กถาย ตุมฺหากํเยว ปน เนกฺขมฺมํ วณฺณยมานา นิสินฺนมฺหาติ ฯ น ภิกฺขเว ตถาคโต เอตรหิเยว เนกฺขมฺมํ นิกฺขนฺโต ปุพฺเพปิ นิกฺขนฺโตเยวาติ อาห ฯ ภิกฺขู ตสฺสตฺถสฺสาวิภาวตฺถํ ภควนฺตํ ยาจึสุ ฯ ภควา ภวนฺตเรน ปฏิจฺฉนฺนํ การณํ ปากฏํ อกาสิ ฯ

อตีเต วิเทหรฏฺเฐ มิถิลายํ มฆเทโว นาม ราชา อโหสิ ธมฺมิโก ธมฺมราชา ฯ โส ทีฆมทฺธานํ เขเปตฺวา เอกทิวสํ กปฺปกํ อามนฺเตสิ ยทา เม สมฺม กปฺปก สิรสฺมึ ปลิตานิ ปสฺเสยฺยาสิ อถ เม อาโรเจยฺยาสีติ ฯ กปฺปโกปิ ทีฆมทฺธานํ เขเปตฺวา เอกทิวสํ รญฺโญ อญฺชนวณฺณานํ เกสานํ อนฺตเร เอกเมว ปลิตํ ทิสฺวา เทว เอกํ เต ปลิตํ ทิสฺสตีติ อาโรเจสิ ฯ เตนหิ เม สมฺม ตํ ปลิตํ อุทฺธริตฺวา ปาณิมฺหิ ฐเปหีติ ฯ เอวํ วุตฺเต สุวณฺณสณฺฑาเสน อุทฺธริตฺวา รญฺโญ ปาณิมฺหิ ปติฏฺฐาเปสิ ฯ ตทา รญฺโญ จตุราสีติวสฺสสหสฺสานิ อายุ อวสิฏฺฐํ อโหสิ ฯ เอวํ สนฺเตปิ ปลิตํ ทิสฺวา มจฺจุราชานํ อาคนฺตฺวา สมีเป ฐิตํ วิย อตฺตานํ อาทิตฺตปณฺณสาลํ ปวิฏฺฐํ วิย จ มญฺญมาโน สํเวคํ อาปชฺชิตฺวา พาลมฆเทว ยาว ปลิตสฺสุปฺปาทา นาม อิเม กิเลเส ชหิตุํ นาสกฺขีติ จินฺเตสิ ฯ ตสฺเสว ปลิตปาตุภูตํ อาวชฺเชนฺตสฺส อนฺโตทาโห อุปฺปชฺชิ สรีเร เสทา มุญฺจึสุ สาฏกา ปีเฬตฺวา อปเนตพฺพาการปฺปตฺตา อเหสุํ ฯ โส อชฺเชว มยา นิกฺขมิตฺวา ปพฺพชิตุํ วฏฺฏตีติ ฯ กปฺปกสฺส สตฺตสหสฺสุฏฺฐานกํ คามวรํ ทตฺวา เชฏฺฐปุตฺตํ ปกฺโกสาเปตฺวา ตาต มม สีเส ปลิตํ ปาตุภูตํ มหลฺลโกมฺหิ ชาโต ภุตฺตา โข ปน เม มนุสฺสกามา อิทานิ ทิพฺพกาเม ปริเยสิสฺสามิ เนกฺขมฺมกาโล มยฺหํ ตฺวํ อิทํ รชฺชํ ปฏิปชฺช อหํ ปน ปพฺพชิตฺวา มฆเทวอมฺพวนุยฺยาเน วสนฺโต สมณธมฺมํ กริสฺสามีติ อาห ฯ ตํ เอวํ ปพฺพชิตุกามํ อมจฺจา อุปสงฺกมิตฺวา เทว กึ ตุมฺหากํ ปพฺพชฺชาการณนฺติ ปุจฺฉึสุ ฯ ราชา ปลิตํ หตฺเถน คเหตฺวา อมจฺจานํ อิทํ คาถมาห