๑๐ พนฺธนโมกฺขชาตกํ

อพทฺธา ตตฺถ พชฺฌนฺตีติ อิทํ สตฺถา เชตวเน วิหรนฺโต จิญฺจมาณวิกํ อารพฺภ กเถสิ ฯ ตสฺสา วตฺถุ ทฺวาทสนิปาเต มหาปทุมชาตเก อาวิภวิสฺสติ ฯ

ตทา ปน สตฺถา น ภิกฺขเว จิญฺจมาณวิกา อิทาเนว มํ อภูเตน อพฺภาจิกฺขติ ปุพฺเพปิ อพฺภาจิกฺขิเยวาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ปุโรหิตสฺส เคเห นิพฺพตฺโต วยปฺปตฺโต ปิตุ อจฺจเยน ตสฺส ปุโรหิโต อโหสิ ฯ เตน อคฺคมเหสิยา วโร ทินฺโน โหติ ภทฺเท ยํ อิจฺฉสิ ตํ วเทยฺยาสีติ ฯ สา เอวมาห มยฺหํ อญฺโญ วโร นาม น ทุลฺลโภ อิโต ปฏฺฐาย อญฺญา อิตฺถี กิเลสวเสน น โอโลเกตพฺพาติ ฯ โส ปฏิกฺขิปิตฺวาปิ ปุนปฺปุนํ ปีฬิยมาโน ตสฺสา วจนํ อติกฺกมิตุํ อสกฺโกนฺโต สมฺปฏิจฺฉิตฺวา ตโต ปฏฺฐาย โสฬสสุ นาฏกิตฺถีสหสฺเสสุ กิเลสวเสน เอกํ อิตฺถิมฺปิ น โอโลเกสิ ฯ