๑๓ กุสนาฬิวคฺควณฺณนา

๑ กุสนาฬิชาตกํ

กเร สริกฺโขติ อิทํ สตฺถา เชตวเน วิหรนฺโต อนาถปิณฺฑิกสฺส นิจฺฉยมิตฺตํ อารพฺภ กเถสิ ฯ

อนาถปิณฺฑิกสฺส หิ มิตฺตสุหชฺชญาติพนฺธวา เอกโต หุตฺวา มหาเสฏฺฐิ อยํ ตยา ชาติโคตฺตธนธญฺญาทีหิ เนว สทิโส น อุตฺตริตโร กสฺมา เอเตน สทฺธึ สนฺถวํ กโรสิ มา กโรหีติ ปุนปฺปุนํ นิวาเรสุํ ฯ อนาถปิณฺฑิโก ปน มิตฺตสนฺถโว นาม หีเนหิปิ สเมหิปิ อติเรเกหิปิ กตฺตพฺโพเยวาติ เตสํ วจนํ อคเหตฺวา โภคคามํ คจฺฉนฺโต ตํ กุฏุมฺพรกฺขกํ กตฺวา อคมาสีติ สพฺพํ กาฬกณฺณิวตฺถุสฺมึ วุตฺตนเยเนว เวทิตพฺพํ ฯ อิธ ปน อนาถปิณฺฑิเกน อตฺตโน ฆรปฺปวตฺติยา อาโรจิตาย สตฺถา คหปติ มิตฺโต นาม ขุทฺทโก นตฺถิ มิตฺตธมฺมํ รกฺขิตุํ สมตฺถภาโว เจตฺถ ปมาณํ มิตฺโต นาม อตฺตนา สโมปิ หีโนปิ วิสิฏฺโฐปิ คเหตพฺโพ สพฺเพปิ หิ เต อตฺตโน ปตฺตภารํ นิตฺถรนฺติเยว อิทานิ ตาว ตฺวํ อตฺตโน นิจฺฉยมิตฺตํ นิสฺสาย กุฏุมฺพสฺส สามิโก ชาโต โปราณา ปน นิจฺฉยมิตฺตํ นิสฺสาย วิมานสามิกา ชาตาติ วตฺวา เตน ยาจิโต อตีตํ อาหริ ฯ