๑๐ สญฺชีวชาตกํ

อสนฺตํ โย ปคฺคณฺหาตีติ อิทํ สตฺถา เวฬุวเน วิหรนฺโต อชาตสตฺตุสฺส รญฺโญ อสนฺตํ สมฺปคฺคหํ อารพฺภ กเถสิ ฯ

โส หิ พุทฺธานํ ปฏิกณฺฏกภูเต ทุสฺสีเล ปาปธมฺเม เทวทตฺเต ปสีทิตฺวา ตํ อสนฺตํ อสปฺปุริสํ ปคฺคยฺห ตสฺส สกฺการํ กริสฺสามีติ พหุํ ธนํ ปริจฺจชิตฺวา คยาสีเส วิหารํ กาเรตฺวา ตสฺส วจนํ คเหตฺวา ปิตรํ ธมฺมราชานํ โสตาปนฺนํ อริยสาวกํ ฆาเตตฺวา อตฺตโน โสตาปตฺติมคฺคสฺส อุปนิสฺสยํ ฉินฺทิตฺวา มหาวินาสํ ปตฺโต ฯ โส หิ เทวทตฺโต ปฐวึ ปวิฏฺโฐติ สุตฺวา กจฺจิ นุ โข มมฺปิ ปฐวี คิเลยฺยาติ ภีตตสิโต รชฺชสุขํ น ลภติ สยเน อสฺสาทํ น วินฺทติ ติพฺพการณาภิตุนฺโน เปโต วิย กมฺปมาโน วิจรติ ฯ โส ปฐวึ คิลมานํ วิย อวีจิชาลํ นิกฺขมนฺตํ วิย อตฺตานํ อาทิตฺตาย โลหปฐวิยา อุตฺตานํ นิปชฺชาเปตฺวา อยสูเลหิ โกฏฺฏิยมานํ วิย จ สมนุปสฺสิ ฯ เตนสฺส ปหฏกุกฺกุฏสฺเสว มุหุตฺตมฺปิ กมฺปมานสฺส อวฏฺฐานํ นาม นาโหสิ ฯ สมฺมาสมฺพุทฺธํ ปสฺสิตุกาโม ขมาเปตุกาโม ปญฺหํ ปุจฺฉิตุกาโม อโหสิ อตฺตโน ปน อปราธมหนฺตตาย อุปสงฺกมิตํ น สกฺโกติ ฯ

อถสฺส ราชคหนคเร กตฺติกรตฺติวาเร สมฺปตฺเต เทวนคเร วิย อลงฺกเต มหาตเล อมจฺจคณปริวุตสฺส กาญฺจนาสเน นิสินฺนสฺส ชีวกํ โกมารภจฺจํ อวิทูเร นิสินฺนํ ทิสฺวา เอตทโหสิ ชีวกํ คเหตฺวา สมฺมาสมฺพุทฺธสฺส สนฺติกํ คมิสฺสามิ น โข ปน สกฺกา มยา อุชุกเมว คนฺตุํ อหํ สมฺม ชีวก สยํ คนฺตุํ น สกฺโกมิ เอหิ มํ สตฺถุ สนฺติกํ เนหีติ อเนกปริยาเยนสฺส รตฺติสมฺปทํ วณฺเณตฺวา กึ นุ โข อชฺช มยํ สมณํ วา พฺราหฺมณํ วา ปยิรูปาเสยฺยาม ยนฺโน ปยิรูปาสตํ จิตฺตํ ปสีเทยฺยาติ วกฺขามิ ตํ สุตฺวา อมจฺจา อตฺตโน สตฺถารานํ วณฺณํ กเถสฺสนฺติ ชีวโกปิ สมฺมาสมฺพุทฺธสฺส วณฺณํ กเถสฺสติ อถ นํ คเหตฺวา สตฺถุ สนฺติกํ คจฺฉิสฺสามีติ ฯ โส ปญฺจหิ ปเทหิ รตฺตึ วณฺเณสิ