๗ สมิทฺธิชาตกํ

อภุตฺวา ภิกฺขสิ ภิกฺขูติ อิทํ สตฺถา ราชคหํ อุปนิสฺสาย ตโปทาราเม วิหรนฺโต สมิทฺธิตฺเถรํ อารพฺภ กเถสิ ฯ

เอกทิวสํ หิ อายสฺมา สมิทฺธิตฺเถโร สพฺพรตฺตึ ปธานํ ปทหิตฺวา อรุณุคฺคมนเวลาย นฺหาตฺวา สุวณฺณวณฺณํ อตฺตภาวํ สุกฺขาปยมาโน อนฺตรวาสกํ นิวาเสตฺวา อุตฺตราสงฺคํ หตฺเถน คเหตฺวา อฏฺฐาสิ ฯ สุปริกมฺมกตา วิย สุวณฺณปฏิมา อตฺตภาวสมิทฺธิยา เยว หิสฺส สมิทฺธีติ นามํ อโหสิ ฯ อถสฺส สรีรโสภคฺคํ ทิสฺวา เอกา เทวธีตา ปฏิพทฺธจิตฺตา เถรํ เอวมาห ตฺวํ โขสิ ภิกฺขุ ทหโร ยุวา สุสุ กาฬเกโส ภทฺเทน โยพฺพเนน สมนฺนาคโต อภิรูโป ทสฺสนีโย ปาสาทิโก, เอวรูปสฺส ตว กาเม อปริภุญฺชิตฺวา โก อตฺโถ ปพฺพชฺชาย, กาเม ตาว ปริภุญฺชสฺสุ, ปจฺฉา ปพฺพชิตฺวา สมณธมฺมํ กริสฺสสีติ ฯ อถ นํ เถโร อาห เทวธีเต อสุกสฺมึ นาม วเย ฐิโต มริสฺสามีติ มม มรณกาลํ น ชานามิ, เอส เม กาโล อปริจฺฉินฺโน, ตสฺมา ตรุณกาเล เยว สมณธมฺมํ กตฺวา ทุกฺขสฺส อนฺตํ กริสฺสามีติ ฯ สา เถรสฺส สนฺติกา ปฏิสนฺถารํ อลภิตฺวา ตตฺเถว อนฺตรธายิ ฯ เถโร สตฺถารํ อุปสงฺกมิตฺวา เอตมตฺถํ อาโรเจสิ ฯ สตฺถา น โข สมิทฺธิ ตฺวญฺเจว เอตรหิ เทวธีตาย ปโลภิโต, ปุพฺเพปิ เทวธีตโร ปณฺฑิตปพฺพชิเต ปโลภึสุ เยวาติ เตน ยาจิโต อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต เอกสฺมึ กาสิกคาเม พฺราหฺมณกุเล นิพฺพตฺติตฺวา วยปฺปตฺโต สพฺพสิปฺเปสุ นิปฺผตฺตึ ปตฺวา อิสิปพฺพชฺชํ ปพฺพชิตฺวา อภิญฺญา จ สมาปตฺติโย จ นิพฺพตฺเตตฺวา หิมวนฺตปฺปเทเส เอกํ ชาตสฺสรํ นิสฺสาย วาสํ กปฺเปสิ ฯ โสปิ สพฺพรตฺตึ ปธานํ ปทหิตฺวา อรุณุคฺคมนเวลาย นฺหาตฺวา เอกํ วกฺกลํ นิวาเสตฺวา เอกํ หตฺเถน คเหตฺวา สรีรํ นิโรทกํ กโรนฺโต อฏฺฐาสิ ฯ อถสฺส รูปโสภคฺคปฺปตฺตํ อตฺตภาวํ โอโลเกตฺวา ปฏิพทฺธจิตฺตา เอกา เทวธีตา โพธิสตฺตํ ปโลภยมานา ปฐมํ คาถมาห