๓ ภรุชาตกํ ๑-

อิสีนมนฺตรํ กตฺวาติ อิทํ สตฺถา เชตวเน วิหรนฺโต โกสลราชานํ อารพฺภ กเถสิ ฯ

ภควโต หิ ภิกฺขุสงฺฆสฺส จ ลาภสกฺกาโร มหา อโหสิ ฯ ยถาห, เตน โข ปน สมเยน ภควา สกฺกโต โหติ ครุกโต มานิโต ปูชิโต อปจิโต ลาภี จีวรปิณฺฑปาตเสนาสนคิลานปจฺจย- เภสชฺชปริกฺขารานํ, ภิกฺขุสงฺโฆปิ โข สกฺกโต โหติ ครุกโต มานิโต ปูชิโต อปจิโต ลาภี จีวรปิณฺฑปาตเสนาสนคิลานปจฺจย- เภสชฺชปริกฺขารานํ, อญฺญติตฺถิยา ปน ปริพฺพาชกา น สกฺกตา โหนฺติ น ครุกตา น มานิตา น ปูชิตา น อปจิตา น ลาภิโน จีวรปิณฺฑปาตเสนาสน- คิลานปจฺจยเภสชฺชปริกฺขารานนฺติ ฯ เต เอวํ ปริหีนลาภสกฺการา

เปฯ อโหรตฺตํ คูฬฺหสนฺนิปาตํ กตฺวา มนฺตยนฺติ สมณสฺส โคตมสฺส อุปฺปตฺติกาลโต ปฏฺฐาย มยํ หตลาภสกฺการา ชาตา, สมโณ โคตโม ลาภคฺคยสคฺคปฺปตฺโต ชาโต, เกน นุ โข การเณนสฺส เอสา สมฺปตฺตีติ ฯ ตตฺเถเก เอวมาหํสุ สมโณ โคตโม สกลชมฺพุทีปสฺส อุตฺตมฏฺฐาเน ภูมิสีเส วสติ, เตนสฺส ลาภสกฺกาโร อุปฺปชฺชตีติ ฯ เสสา อตฺเถตํ การณํ, สเจ มยมฺปิ เชตวนปิฏฺเฐ ติตฺถิยารามํ กาเรม, เอวํ ลาภิโน ภวิสฺสามาติ อาหํสุ ฯ เต สพฺเพปิ เอวเมตนฺติ สนฺนิฏฺฐานํ กตฺวา สเจ ปน มยํ รญฺโญ อนปโลเกตฺวา ๑- อารามํ กาเรสฺสาม, ภิกฺขู วาเรสฺสนฺติ, ลญฺจํ ลภิตฺวา อภิชฺชนโก นาม นตฺถิ, ตสฺมา รญฺโญ ลญฺจํ ทตฺวา อารามฏฺฐานํ คณฺหิสฺสามาติ สนฺนิฏฺฐานํ กตฺวา อุปฏฺฐากชเน ยาจิตฺวา รญฺโญ สตสหสฺสํ ทตฺวา มหาราช มยํ เชตวนปิฏฺฐิยํ ติตฺถิยารามํ กาเรสฺสาม, สเจ ภิกฺขู กาตุํ น ทสฺสามาติ ตุมฺหากํ อาโรเจนฺติ, เตสํ ปฏิวจนํ น ทาตพฺพนฺติ อาหํสุ ฯ ราชา ลญฺจโลเภน สาธูติ สมฺปฏิจฺฉิ ฯ ติตฺถิยา ราชานํ สงฺคณฺหิตฺวา วฑฺฒกึ ปกฺโกสาเปตฺวา กมฺมํ ปฏฺฐเปสุํ ฯ มหาสทฺโท อโหสิ ฯ สตฺถา เก ปเนเต อานนฺท อุจฺจาสทฺทา มหาสทฺทาติ ปุจฺฉิ ฯ ติตฺถิยา ภนฺเต เชตวนปิฏฺฐิยํ ติตฺถิยารามํ กาเรนฺติ, ตตฺเถโส สทฺโทติ ฯ อานนฺท เนตํ ฐานํ ติตฺถิยารามสฺส อนุจฺฉวิกํ, ติตฺถิยา อุจฺจาสทฺทกามา, น สกฺกา เตหิ สทฺธึ วสิตุนฺติ วตฺวา ภิกฺขุสงฺฆํ สนฺนิปาเตตฺวา คจฺฉถ ภิกฺขเว, รญฺโญ อาจิกฺขิตฺวา