๙ ปลายิชาตกํ

คชคฺคเมเฆภีติ อิทํ สตฺถา เชตวเน วิหรนฺโต ปลายิปริพฺพาชกํ อารพฺภ กเถสิ ฯ

โส กิร วาทตฺถาย สกลชมฺพุทีปํ วิจริตฺวา กิญฺจิ ปฏิวาทํ อลภิตฺวา อนุปุพฺเพน สาวตฺถึ ปตฺวา อตฺถิ นุ โข โกจิ มยา สทฺธึ วาทํ กาตุํ สมตฺโถติ มนุสฺเส ปุจฺฉิ ฯ มนุสฺสา ตาทิสานํ สหสฺเสนปิ สทฺธึ วาทํ กาตุํ สมตฺโถ สพฺพญฺญู ทิปทานํ อคฺโค มหาโคตโม ธมฺมิสฺสโร ปรปฺปวาทมทฺทโน, สกเลปิ ชมฺพุทีเป อุปฺปนฺโน ปรปฺปวาโท ตํ ภควนฺตํ อติกฺกมิตุํ สมตฺโถ นตฺถิ, เวลนฺตํ ปตฺวา สมุทฺทอูมิโย วิย หิ สพฺเพ วาทา ตสฺส ปาทมูลมฺปิ ปตฺวา จุณฺณวิจุณฺณา โหนฺตีติ พุทฺธคุเณ กเถสุํ ฯ ปริพฺพาชโก กหํ ปน โส เอตรหีติ ปุจฺฉิตฺวา เชตวเนติ สุตฺวา อิทานิสฺส วาทํ อาโรเปสฺสามีติ มหาชนปริวุโต เชตวนํ คจฺฉนฺโต เชเตน ปน ราชกุมาเรน นวโกฏิธนํ วิสฺสชฺเชตฺวา การิตํ เชตวนทฺวารโกฏฺฐกํ ทิสฺวา ว อยํ สมณสฺส โคตมสฺส วสนปาสาโทติ ปุจฺฉิตฺวา ทฺวารโกฏฺฐโก อยนฺติ สุตฺวา ทฺวารโกฏฺฐโก ตาว เอวรูโป, วสนเคหํ กีทิสํ ภวิสฺสตีติ วตฺวา คนฺธกุฏิ นาม อปฺปเมยฺยาติ วุตฺเต เอวรูเปน สมเณน สทฺธึ โก วาทํ กริสฺสตีติ ตโตว ปลายิ ฯ มนุสฺสา อุนฺนาทิโน หุตฺวา เชตวนํ ปวิสิตฺวา สตฺถารา กึ อกาเล อาคตตฺถาติ วุตฺตา ตํ ปวตฺตึ กถยึสุ ฯ สตฺถา น โข อุปาสกา อิทาเนว ปุพฺเพเปส มม วสนฏฺฐานสฺส ทฺวารโกฏฺฐกํ ทิสฺวา ปลายเตวาติ วตฺวา เตหิ ยาจิโต อตีตํ อาหริ ฯ

อตีเต คนฺธารรฏฺเฐ ตกฺกสิลายํ โพธิสตฺโต รชฺชํ กาเรสิ ฯ พาราณสิยํ พฺรหฺมทตฺโต ฯ โส ตกฺกสิลํ คณฺหิสฺสามีติ มหนฺเตน พลนิกาเยน คนฺตฺวา นครโต อวิทูเร ฐตฺวา อิมินา นิยาเมน หตฺถี เปเสถ, อิมินา อสฺเส, อิมินา รเถ, อิมินา ปตฺตี, เอวํ ธาวิตฺวา อาวุเธหิ ปหรถ, เอวํ ฆนวสฺสํ วลาหกา วิย สรวสฺสํ วสฺสถาติ เสนํ วิจาเรนฺโต อิมํ คาถาทฺวยมาห