๙ อุปาหนวคฺควณฺณนา

๑ อุปาหนชาตกํ ฯ

ยถาปิ กตาติ อิทํ สตฺถา เชตวเน วิหรนฺโต เทวทตฺตํ อารพฺภ กเถสิ ฯ

ธมฺมสภายํ หิ ภิกฺขู กถํ สมุฏฺฐาเปสุํ อาวุโส เทวทตฺโต อาจริยปจฺจกฺโข ๑- ตถาคตสฺส ปฏิปกฺโข ปฏิสตฺตุ หุตฺวา มหาวินาสํ ปาปุณีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว เทวทตฺโต อิทาเนว อาจริยปจฺจกฺโข ๑- มม ปฏิปกฺโข หุตฺวา มหาวินาสํ ปาปุณิ, ปุพฺเพปิ ปฏิปกฺโข เยวาติ วตฺวา อตีตํ อาหริ ฯ