วาตคฺคสินฺธวชาตกํ

เยนาสิ กีสิยา ปณฺฑูติ อิทํ สตฺถา เชตวเน วิหรนฺโต สาวตฺถิยํ อญฺญตรํ กุฏุมฺพิกํ อารพฺภ กเถสิ ฯ

สาวตฺถิยํ กิเรกา อิตฺถี เอกํ อภิรูปํ กุฏุมฺพิกํ ทิสฺวา ปฏิพทฺธจิตฺตา อโหสิ ฯ สกลสรีรํ ฌายมาโน วิย ตสฺสา อพฺภนฺตเร กิเลสคฺคิ อุปฺปชฺชิ ฯ สา เนว กายสฺสาทํ น จิตฺตสฺสาทํ อลภิ ฯ ภตฺตมฺปิสฺสา น รุจฺจิ ฯ เกวลํ มญฺจกอฏนึ คเหตฺวา นิปชฺชิ ฯ อถ นํ อุปฏฺฐายิกา จ สหายิกา จ ปุจฺฉึสุ กินฺนุโข ตฺวํ กมฺปมานจิตฺตา อฏนึ คเหตฺวา นิปนฺนา กินฺเต อผาสุกนฺติ ฯ ตาสํ เอกํ เทฺว วาเร อกเถตฺวา ปุนปฺปุนํ วุจฺจมานา ตมตฺถํ อาโรเจสิ ฯ อถ นํ ตา สมสฺสาเสตฺวา ตฺวํ มา โภติ จินฺตยิ มยํ ตํ อาเนสฺสามาติ วตฺวา คนฺตฺวา กุฏุมฺพิเกน สทฺธึ มนฺเตสุํ ฯ โส ปฏิกฺขิปิตฺวา ปุนปฺปุนํ วุจฺจมาโน อธิวาเสสิ ฯ ตา อสุกทิวเส อสุกเวลาย อาคจฺฉาหีติ ปฏิญฺญํ คาเหตฺวา คนฺตฺวา ตสฺสา อาโรเจสุํ ฯ สา สุณนฺตี อตฺตโน สยนคพฺภํ สชฺเชตฺวา อตฺตานํ อลงฺกริตฺวา สยนปิฏฺเฐ นิสินฺนา ตสฺมึ อาคนฺตฺวา สยเนกเทเส นิสินฺเน จินฺเตสิ สจาหํ อิมสฺส คุรุกํ อกตฺวา อิทาเนว โอกาสํ กริสฺสามิ อิสสริยํ เม ปริหายิสฺสติ อาคตทิวเสเยว โอกาสกรณํ นาม อการณํ อชฺช นํ มงฺกุํ กตฺวา อญฺญสฺมึ ทิวเส โอกาสํ กริสฺสามีติ ฯ อถ นํ หตฺถคฺคหณาทิวเสน เกฬึ กาตุํ อารทฺธํ หตฺเถ คเหตฺวา อเปหิ อเปหิ น เม ตยา อตฺโถติ นิกฺกฑฺเฒสิ ฯ โส โอสกฺกิตฺวา ลชฺชิโต อุฏฺฐาย อตฺตโน เคหเมว คโต ฯ อิตรา อิตฺถิโย ตาย ตถากตภาวํ ญตฺวา กุฏุมฺพิเก นิกฺขนฺเต ตํ อุปสงฺกมิตฺวา เอวมาหํสุ ตฺวํ ตสฺมึ ปฏิพทฺธจิตฺตา อาหารํ ปฏิกฺขิปิตฺวา นิปชฺชิ อถ นํ มยํ ปุนปฺปุนํ ยาจิตฺวา อานยิมฺหา ตสฺส กสฺมา โอกาสํ น อกาสีติ ฯ สา ตมตฺถํ อาโรเจสิ ฯ อิตรา เตนหิ ปญฺญายิสฺสสีติ วตฺวา ปกฺกมึสุ ฯ กุฏุมฺพิโก ปุน นิวตฺติตฺวา น โอโลเกสิ ฯ สา ตํ อลภมานา สุสฺสมานา นิราหารา ตตฺเถว ชีวิตกฺขยํ ปาปุณิ ฯ กุฏุมฺพิโก ตสฺสา มตภาวํ สุตฺวา พหุมาลาคนฺธวิเลปนํ อาทาย เชตวนํ คนฺตฺวา สตฺถารํ ปูเชตฺวา วนฺทิตฺวา เอกมนฺตํ นิสีทิ สตฺถารา จ กินฺนุโข อุปาสก น ปญฺญายสีติ ปุจฺฉิโต ตมตฺถํ อาโรเจตฺวา สฺวาหํ ภนฺเต เอตฺตกํ กาลํ ลชฺชาย พุทฺธุปฏฺฐานํ นาคโตติ อาห ฯ สตฺถา อุปาสก น อิทาเนว สา กิเลสวเสน ตํ ปกฺโกสาเปตฺวา อาคตกาเล ตํ โอกาสํ อกตฺวา ลชฺชาเปสิ ปุพฺเพปิ ปน ปณฺฑิเตสุปิ (ปุพฺเพ) ปฏิพทฺธจิตฺตา หุตฺวา ปกฺโกสาเปตฺวา อาคตกาเล โอกาสํ อกตฺวา กิลเมตฺวาว อุยฺโยเชสีติ วตฺวา เตน ยาจิโต อตีตํ อาหริ ฯ