สุชาตาชาตกํ

น หิ วณฺเณน สมฺปนฺนาติ อิทํ สตฺถา เชตวเน วิหรนฺโต อนาถปิณฺฑิกสฺส สุณิสํ ธนญฺชยเสฏฺฐิธีตรํ วิสาขาย กนิฏฺฐภคินึ สุชาตํ อารพฺภ กเถสิ ฯ

สา กิร มหนฺเตน ยเสน อนาถปิณฺฑิกสฺส ฆรํ ปูรยมานา ปาวิสิ ฯ มหากุลสฺส ธีตา อหนฺติ มานตฺถทฺธา อโหสิ โกธนา จณฺฑา ผรุสา สสฺสุรสสฺสุสามิกวตฺตานิ น กโรติ เคหชนํ ตชฺเชนฺตี ปหรนฺตี วิจรติ ฯ อเถกทิวสํ สตฺถา ปญฺจหิ ภิกฺขุสเตหิ ปริวุโต อนาถปิณฺฑิกสฺส เคหํ คนฺตฺวา นิสีทิ ฯ มหาเสฏฺฐีปิ ธมฺมํ สุณนฺโต ภควนฺตํ อุปนิสีทิ ฯ ตสฺมึ ขเณ สุชาตา ทาสกมฺมกเรหิ สทฺธึ กลหํ กโรติ ฯ สตฺถา ธมฺมกถํ ฐเปตฺวา กึสทฺโท เอโสติ อาห ฯ เอกา ภนฺเต กุลสุณฺหา อคารวา เนวสฺสา สสฺสุรสสฺสุสามิกวตฺตํ อตฺถิ อทานสีลา อสฺสทฺธา อปฺปสนฺนา อโหรตฺตํ กลหํ กุรุมานา วิจรตีติ ฯ เตนหิ นํ ปกฺโกสถาติ ฯ สา อาคนฺตฺวา วนฺทิตฺวา เอกมนฺตํ อฏฺฐาสิ ฯ อถ นํ สตฺถา สตฺต สุชาเต ปุริสสฺส ภริยา ตาสํ ตฺวํ กตราสีติ ปุจฺฉิ ฯ ภนฺเต นาหํ สงฺขิตฺเตน กถิตสฺส อตฺถํ ชานามิ วิตฺถาเรน เม กเถถาติ ฯ สตฺถา เตนหิ โอหิตโสตา สุณาหีติ วตฺวา อิมา คาถา อภาสิ

ปทุฏฺฐจิตฺตา อหิตานุกมฺปินี