พฺยคฺฆชาตกํ

เยน มิตฺเตน สํสคฺคาติ อิทํ สตฺถา เชตวเน วิหรนฺโต โกกาลิกํ อารพฺภ กเถสิ ฯ โกกาลิกวตฺถุ เตรสนิปาเต ตกฺการิยชาตเก อาวิภวิสฺสติ ฯ

โกกาลิโก ปน สารีปุตฺตโมคฺคลฺลาเน คเหตฺวา อาคมิสฺสามีติ กาสิกรฏฺฐโต เชตวนํ อาคนฺตฺวา สตฺถารํ วนฺทิตฺวา เถเร อุปสงฺกมิตฺวา อาวุโส รฏฺฐวาสิโน มนุสฺสา ตุมฺเห ปกฺโกสนฺติ เอถ คจฺฉามาติ อาห ฯ คจฺฉ ตฺวํ อาวุโส มยํ น คจฺฉามาติ ฯ โส เถเรหิ ปฏิกฺขิตฺโต สยเมว อคมาสิ ฯ อถ ภิกฺขู ธมฺมสภายํ กถํ สมุฏฺฐาเปสุํ อาวุโส โกกาลิโก สารีปุตฺตโมคฺคลฺลาเนหิ สหาปิ วินาปิ วตฺติตุํ น สกฺโกติ สํโยคมฺปิ น สหติ วิสํโยคมฺปิ น สหตีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปิ โกกาลิโก สารีปุตฺตโมคฺคลฺลาเนหิ เนว สห น วินา วตฺติตุํ สกฺโกตีติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อญฺญตรสฺมึ อรญฺญายตเน รุกฺขเทวตา หุตฺวา นิพฺพตฺติ ฯ ตสฺส วิมานโต อวิทูเร อญฺญตรสฺมึ วนปฺปติเชฏฺฐเก อญฺญตรา รุกฺขเทวตา หุตฺวา วสติ ฯ ตสฺมึ วนสณฺเฑ สีโห จ พฺยคฺโฆ จ วสนฺติ ฯ เตสํ ภเยน น โกจิ ตตฺถ เขตฺตํ กสติ น รุกขํ ฉินฺทติ นิวตฺเตตฺวา โอโลเกตุํ สมตฺโถ นาม นตฺถิ ฯ เต ปน สีหพฺยคฺฆา นานปฺปกาเรปิ มิเค วเธตฺวา ขาทนฺติ ขาทิตาวเสสํ ตตฺเถว ปหาย คจฺฉนฺติ ฯ เตสํ คนฺเธน โส วนสณฺโฑ อสุจิกุณปคนฺโธ โหติ ฯ อถ อิตรา รุกฺขเทวตา อนฺธพาลา การณาการณํ อชานมานา เอกทิวสํ โพธิสตฺตํ อาห สมฺม เอเต โน สีหพฺยคฺเฆ นิสฺสาย วนสณฺโฑ อสุจิกุณปคนฺโธ ชาโต อหํ เอเต ปลาเปมีติ ฯ โพธิสตฺโต สมฺม อิเม เทฺว นิสฺสาย อมฺหากํ วิมานานิ รกฺขิยนฺติ เอเตสุ ปลายนฺเตสุ วิมานานิ โน นสฺสิสฺสนฺติ สีหพฺยคฺฆานํ ปทํ อปสฺสนฺตา มนุสฺสา สพฺพํ วนํ ฉินฺทิตฺวา เอกงฺคณํ กตฺวา เขตฺตานิ กสนฺติ มา เต เอวํ รุจฺจีติ วตฺวา ปุริมา เทฺว คาถา อภาสิ