สิริชาตกํ

ยํ อุสฺสุกฺกา สงฺฆรนฺตีติ อิทํ สตฺถา เชตวเน วิหรนฺโต เอกํ สิริโจรพฺราหฺมณํ อารพฺภ กเถสิ ฯ

อิมสฺมึ ชาตเก ปจฺจุปฺปนฺนวตฺถุ เหฏฺฐา ขทิรงฺคารชาตเก วิตฺถาริตเมว ฯ อิธ ปน สา อนาถปิณฺฑิกสฺส ฆเร จตุตฺเถ ทฺวารโกฏฺฐเก วสนกา มิจฺฉาทิฏฺฐิเทวตา ทณฺฑกมฺมํ กโรนฺตี จตุปณฺณาสหิรญฺญโกฏิโย อาหริตฺวา โกฏฺฐเก ปูเรตฺวา เสฏฺฐินา สทฺธึ สหายิกา อโหสิ ฯ อถ นํ โส อาทาย สตฺถุ สนฺติกํ อคมาสิ ฯ สตฺถา ตสฺสา ธมฺมํ เทเสสิ ฯ สา ธมฺมํ สุตฺวา โสตาปนฺนา อโหสิ ฯ ตโต ปฏฺฐาย เสฏฺฐิโน ยโส ยถาปุราโณว ชาโต ฯ อเถโก สาวตฺถีวาสี สิริลกฺขณชานนพฺราหฺมโณ จินฺเตสิ อนาถปิณฺฑิโก ทุคฺคโต หุตฺวา ปุน อิสฺสโร ชาโต ยนฺนูนาหํ ตํ ทฏฺฐุกาโม วิย คนฺตฺวา ตสฺส ฆรโต สิรึ เถเนตฺวา อาคจฺเฉยฺยนฺติ ฯ โส ตสฺส ฆรํ คนฺตฺวา เตน กตสกฺการสมฺมาโน สาราณียกถาย วตฺตมานาย กิมตฺถํ อาคโตสีติ วุตฺเต กตฺถ นุโข สิริ ปติฏฺฐิตาติ โอโลเกสิ ฯ เสฏฺฐิโน จ สพฺพเสโต โธตสงฺขปฏิภาโค กุกฺกุโฏ สุวณฺณปญฺชเร ปกฺขิปิตฺวา ฐปิโต อตฺถิ ฯ ตสฺส จูฬาย สิริ ปติฏฺฐาสิ ฯ พฺราหฺมโณ โอโลกยมาโน สิริยา ตตฺถ ปติฏฺฐิตภาวํ ญตฺวา อหํ มหาเสฏฺฐิ ปญฺจสเต มาณเว มนฺเต วาเจมิ อกาลรวึ เอกํ กุกฺกุฏํ นิสฺสาย เต จ มยญฺจ กิลมาม อยญฺจ กิร กุกฺกุโฏ กาลรวี อิมสฺสตฺถาย อาคโตมฺหิ เทหิ เม เอตํ กุกฺกุฏนฺติ อาห ฯ คณฺห พฺราหฺมณ เทมิ เต กุกฺกุฏนฺติ ฯ เทมีติ จ วุตฺตกฺขเณเยว สิริ ตสฺส จูฬโต อปคนฺตฺวา อุสฺสีสเก ฐปิเต มณิกฺขนฺเธ ปติฏฺฐาสิ ฯ พฺราหฺมโณ สิริยา มณิมฺหิ ปติฏฺฐิตภาวํ ญตฺวา ตมฺปิ ยาจิ ฯ มณิมฺปิ เทมีติ วุตฺตกฺขเณเยว สิริ มณิโต อปคนฺตฺวา อุสฺสีสเก ฐปิตอารกฺขยฏฺฐิยํ ปติฏฺฐาสิ ฯ พฺราหฺมโณ ตตฺถ ปติฏฺฐิตภาวํ ญตฺวา ตมฺปิ ยาจิ ฯ คเหตฺวา คจฺฉาติ วุตฺตกฺขเณเยว สิริ ยฏฺฐิโต อปคนฺตฺวา ปุญฺญลกฺขณเทวิยา นาม เสฏฺฐิโน อคฺคมเหสิยา สีเส ปติฏฺฐาสิ ฯ สิริโจรพฺราหฺมโณ ตตฺถ ปติฏฺฐิตภาวํ ญตฺวา อวิสชฺชนิยํ ภณฺฑํ เอตํ ยาจิตุมฺปิ น สกฺโกมีติ จินฺเตตฺวา เสฏฺฐึ เอตทโวจ มหาเสฏฺฐิ อหํ ตุมฺหากํ เคเห สิรึ เถเนตฺวา คมิสฺสามีติ อาคญฺฉึ สิริ ปน เต กุกฺกุฏสฺส จูฬาย ปติฏฺฐิตา อโหสิ อิมสฺมึ มม ทินฺเน ตโต อปคนฺตฺวา มณิมฺหิ ปติฏฺฐหิ มณิมฺหิ ทินฺเน อารกฺขยฏฺฐิยํ ปติฏฺฐหิ อารกฺขยฏฺฐิยา ทินฺนาย ตโต อปคนฺตฺวา ปุญฺญลกฺขณเทวิยา สีเส ปติฏฺฐหิ อิมํโข ปน อวิสชฺชนิยํ ภณฺฑนฺติ น สกฺกา ตว สิรึ เถเนตุํ ตว สนฺตกํ ตเวว โหตูติ อุฏฺฐายาสนา ปกฺกามิ ฯ อนาถปิณฺฑิโก อิมํ การณํ สตฺถุ กเถสฺสามีติ วิหารํ คนฺตฺวา สตฺถารํ ปูเชตฺวา วนฺทิตฺวา เอกมนฺตํ นิสินฺโน สพฺพนฺตํ ตถาคตสฺส อาโรเจสิ ฯ สตฺถา ตํ สุตฺวา น โข คหปติ อิทาเนว อญฺเญสํ สิริ อญฺญตฺถ คจฺฉติ ปุพฺเพปิ อปฺปปุญฺเญหิ อุปฺปาทิตสิริ ปน ปุญฺญวนฺตานํเยว ปาทมูเล คตาติ วตฺวา เตน ยาจิโต อตีตํ อาหริ ฯ